Jude Bellingham është shprehur jashtëzakonisht krenar për hapin e madh të vëllait të tij të vogël, Jobe Bellingham, i cili u transferua këtë verë nga Sunderland te Borussia Dortmund.
Bellingham i ri debutoi me Dortmund në Kupën Botërore për Klube të zhvilluar në Shtetet e Bashkuara, ku la menjëherë gjurmë duke shënuar një gol dhe dhënë një asistim në katër paraqitje.
Ashtu si në kohën kur luante për Sunderland, edhe te Dortmund ai mban emrin e tij të parë, “Jobe”, në fanellë, një mënyrë për të shmangur krahasimet me vëllain e tij të madh.
“Jude më tha vetëm ‘shijoje’”, është shprehur Jobe në një deklaratë për mediat, duke treguar mbështetjen që ka marrë nga familja.
Ndryshe nga Jude, që është një mesfushor me tipare sulmuese dhe luan më afër zonës kundërshtare, Jobe operon në një pozicion më të thellë në mesfushë.
Ai ka theksuar se për të është e rëndësishme performanca në fushë dhe jo fama jashtë saj.
“Nuk dua të jem një superyll apo ndonjë figurë e madhe jashtë lojës. Dua të përqendrohem dhe të jem një nga lojtarët më të mirë në fushë”, ka deklaruar ai.
