Kandidati republikan për president të Shteteve të Bashkuara, Donald Trump, tha të martën se Bashkimi Evropian do të duhet “të paguajë një çmim të madh” për mosblerjen e eksporteve të mjaftueshme amerikane, nëse ai i fiton zgjedhjet presidenciale të 5 nëntorit.
“Do t’ju them diçka, Bashkimi Evropian tingëllon shumë bukur, shumë këndshëm, apo jo? Të gjitha shtetet e bukura e të vogla evropiane që bëhen bashkë” – tha miliarderi amerikan gjatë një tubimi në Pensilvani, pasi premtoi se do ta miratonte “aktin Trump për tregti reciproke”, raporton agjencia “Reuters”.
“Ata nuk i marrin veturat tona. Ata nuk i marrin prodhimet tona të fermave. Ata shesin miliona e miliona vetura në Shtetet e Bashkuara. Jo, jo, jo, ata do të duhet të paguajnë një çmim të madh” – paralajmëroi ish-kreu i Shtëpisë së Bardhë.
Trumpi është zotuar për vendosjen e një takse të importit prej 10 për qind ndaj të gjitha shteteve, ndërsa 60 për qind për mallrat që vijnë nga Kina. Një veprim i tillë do t’i godiste zinxhirët furnizues në mbarë botën, me gjasë duke nxitur hakmarrje e rritje të kostove, paralajmërojnë ekonomistët.
Ai e ka shqetësuar ishullin me qeverisje demokratike, Tajvanin, duke thënë se ky vend duhet t’i paguajë Shtetet e Bashkuara për mbrojtjen e tij dhe se ishulli ia kishte marrë Amerikës biznesin e gjysmëpërçuesve. Shtetet e Bashkuara e kanë detyrim ligjor ofrimin e mjeteve të mbrojtjes për Tajvanin, edhe pse nuk kanë marrëdhënie diplomatike formale me të.
