Dalibor Jevtiq nga Lista Serbe, ka deklaruar se ekziston mundësia që edhe serbët në jug të të Mitrovicës të largohen nga institucionet e Kosovës.
Ai tha se kryeministri i Kosovës, Albin Kurti, i interpreton ligjet në një mënyrë, që i përshtatet atij dhe se në Kosovë nuk respektohen ligjet aktuale lidhur me të drejtat serbe dhe komuniteteve të tjera joshumicë.
Jevtiq tha gjithashtu se situata në Kosovë, që nga ardhja e Kurtit në pushtet po vështirësohet çdo ditë e më shumë, sa i përket jetës dhe pozitës së serbëve në atë pjesë.
“Gjithçka që ka ndodhur së fundi është dëshmi se ndërkombëtarët nuk po e bëjnë punën e tyre sa i përket komuniteteve, para se gjithash për qetësimin e situatës dhe tejkalimin e tensioneve”, tha ai, transmeton lajmi.net.
Jevtiq tha gjithashtu se në Kosova “ka dhunë institucionale në të gjitha nivelet”, e që sipas tij serbët janë “viktimat të asaj që Kurti synon në kuptimin përfundimtar, e që është të vendos popullin serb në pozitë të vështirë dhe që t’i bëjë të largohen nga aty”.
