Analisti Kastriot Jahaj ka kritikuar Qeverinë Kurti për mënyrën se si janë duke e trajtuar çështjen e Asociacionit të Komunave me shumicë serbe, duke theksuar se ata kanë sjellë një “Zajednicë”, kundër secilës protestonte dikur Lëvizja Vetëvendosja.
Jahaj shprehu besimin se Qeveria aktuale do ta dërgojë në Gjykatën Kushtetuese draftstatutin (evropian) të Asociacionit.
“Unë nuk e kam asnjë dyshim që kjo Qeveri, Asociacionin ashtu siç është dhe që e ka pranuar, do ta dërgojë në Gjykatën Kushtetuese. Kjo qeveri, edhe do ta shihni më 9 shkurt çka do të ndodhë edhe me përkrahjen që do të ketë pas 9 shkurt, pasi qeveria si e tillë ka ardhur në pushtet me premtimin që dialogu me Serbinë do të jetë prioriteti i 6-të ose 7-të, por tani ka dalë prioriteti i parë. Çështjet ekonomike të vendit, papunësia e të tjera kanë dalë si prioritete të 10-ta ose 20-ta. Kjo Qeveri po ashtu ka ardhur në pushtet me moton ‘Zajednica nuk kalon’. Edhe e kanë sjellë një ‘Zajednicë’ edhe më të keqe”, ka thënë Jahaj në Debat Plus.