Në trailer-in e sapopublikuar, J.Lo shfaqet me një ndryshim të guximshëm në pamje. Në një skenë ajo shfaqet me një prerje flokësh pixie, me ngjyrë të zezë të errët, krejt ndryshe nga flokët e saj karakteristike në ngjyrë karamel.
Për të plotësuar stilin vampir, ajo ka zgjedhur një make-up dramatik: qerpikë të gjatë, sy me tone të errëta, faqe rozë të theksuara dhe buzë të kuqe me shkëlqim.
Veshja? Një fustan i zi me ndriçim metalik, me korse të ngushtë, dekolte të theksuar, si dhe fund të ngjitur pas trupit. Aksesorët përfshijnë doreza të zeza transparente dhe një varëse me diamantë, që e bën pamjen edhe më spektakolare.
Por kjo është vetëm një nga pamjet. Në një tjetër skenë, Lopez transformohet në një divë bionde në stilin e Marilyn Monroe. Flokët i ka të stiluar në kaçurrela të mëdha voluminoze dhe të ndara në mes. Grimi është përsëri në frymën e Hollywood-it klasik: buzëkuq i kuq i theksuar, qerpikë të dendur, si dhe vetulla të holla të vijëzuara.
Një tjetër veshje që bie në sy është një fustan i artë me shkëlqim ndërsa flokët i ka të kapur lart në një model elegant, që e rikthen edhe një herë te imazhi i Monroe-s.
Pamja e fundit në video është një fustan i bardhë në formë xhakete të shkurtër, të kombinuar me kapelë cilindrike po të bardhë dhe sandale me taka argjendi.
