Kandidatja e NISMA’së Socialdemokrate për deputete Xhevahire Izmaku, ka reaguar pas lajmit se pritet të shkarkohet kundërligjshëm Jeton Mehmeti nga KPM.
Izmaku u shpreh se po shkelet e një të drejte kushtetuese.
Postimi i fundit:
Reagim për situatën në KPM
Po shkelet një e drejtë kushtetuese dhe një parim themelor i demokracisë – mosndërhyrja politike në institucionet e pavarura.
Komisioni i Pavarur për Media (KPM), si një gardian i lirisë së mediave, po përballet me një ndërhyrje flagrante që cenon rëndë pavarësinë e tij.
Paralajmërimi për shkarkimin e kryetarit të KPM-së, z. Jeton Mehmeti, në mënyrë të kundërligjshme dhe disa ditë para përfundimit të mandatit, është një goditje e drejtpërdrejtë ndaj integritetit institucional. Kjo procedurë, e motivuar politikisht, synon uzurpimin e pozitave kryesore në KPM për qëllime që nuk i shërbejnë interesit publik dhe rregullimit të drejtë të mediave.
Ky zhvillim jo vetëm që shkel normat ligjore dhe etike, por edhe rrezikon rëndë lirinë e mediave – një e drejtë e garantuar kushtetuese. Manipulimi i tillë i institucioneve të pavarura është i papranueshëm dhe dëmton besimin e qytetarëve në demokraci dhe shtet ligjor.
I bashkohem thirrjes për ndërprerjen e menjëhershme të kësaj procedure të padrejtë. Ftoj Zyrën Ekzekutive të KPM-së që të mbrojë pavarësinë e institucionit dhe të kundërshtojë haptazi këtë ndërhyrje.
@Njëkohësisht, ftoj mediat dhe aktorët e shoqërisë civile që të mbikëqyrin me kujdes këtë proces dhe të dokumentojnë çdo përpjekje për të manipuluar funksionimin e KPM-së.
Kjo ndërhyrje e rrezikshme do të ndikojë negativisht jo vetëm në vendimmarrjen brenda KPM-së, por edhe në perceptimin ndërkombëtar për lirinë e shprehjes dhe demokracinë në vendin tonë.
Prandaj, duhet të mbrojmë me vendosmëri integritetin e këtij institucioni dhe vlerat kushtetuese që ai përfaqëson.
Xhevahire Izmaku
