Në Dhomat e Specializuara të Kosovës (DhSK) në Hagë është rrëzuar kërkesa e Isni Klajt për të marrë një version të paredaktuar të urdhrit për kontrollim dhe sekuestrim.
Sipas zëdhënësit të DhSK-së, Michael Doyle, gjyqtarja e procedurës paraprake, Marijorie Masselot vendosi që të lëshonte një version të dytë me ma pak redaktime të këtij urdhri, i cili do iu dorëzohet ekipeve mbrojtëse, raporton “Betimi për Drejtësi“.
“Në çështjen gjyqësore Hashim Thaçi, Bashkim Smakaj, Fadil Fazliu, Isni Kilaj dhe Hajredin Kuçi, më 27 gusht, Gjykatësja e Procedurës Paraprake rrëzoi kërkesën e mbrojtjes së Kilajt për të marrë versionin e paredaktuar të një urdhri të mëparshëm për kontrollim dhe sekuestrim, dhe vendosi se do të lëshohet një version i dytë konfidencial me më pak redaktime i vendimit për Kontrollim dhe Sekuestrim që do t’iu dorëzohet së shpejti të gjitha ekipeve të Mbrojtjes”, tha Doyle.
Në çështjen gjyqësore ndaj Hashim Thaçit, Kadri Veselit, Rexhep Selimit dhe Jakup Kransiqit, Doyle tregoi se trupi gjykues ka miratuar pjesërisht një kërkesë të tyre për të bërë publike disa pjesë të transkriptit të seancës së 27 marsit 2025 në të cilën ishte diskutuar për një prokuror i cili më parë kishte punuar në Njesinë e Parbaurgimit të DhSK-së.
Sipas Doyle, ishte konstatuar se disa pjesë të transkriptit nuk përmbanin informacione konfidenciale dhe disa të tjera po.
“Trupi gjykues u pajtua me mbrojtjen se këto pjesë të transkriptit nuk trajtojnë aspekte konfidenciale apo tema që janë objekt i masave mbrojtëse. Veç kësaj, trupi gjykues nuk mundi të evidentonte ndonjë interes publik relevant që do të përligjte apo justifikonte redaktime të tjera të kësaj pjese të procesverbalit”, tha Doyle.
Zëdhënësi foli edhe për vendimin e majit 2025 i cili së fundi u bë publik në këtë rast lidhur me një kërkesë të Prokurorisë për të pranuar në prova disa dokumente lidhur me pretendime për ndikim në dëshmitarët në këtë rast. Kërkesa në fjalë, sipas Doyle, u pranua pjesërisht.
“Provat në fjalë lidhen me incizimet që janë bërë gjatë vizitave në objektin e paraburgimit më 2023 të cilat duket se tregojnë zotin Thaçi duke u dhënë udhëzime të hollësishme disa prej vizitorëve të tij për mënyrën si duhet të ndikojnë në dëshmitë e dëshmitarëve në gjykimin e tij për krime lufte”, u shpreh Doyle.
Sipas tij, u konstatua se provat janë relevante dhe të pranueshme për të vlerësuar besueshmërinë e dëshmitarëve që kanë dhënë dëshmi në këtë gjyki,m si dhe për të vlerësuar atmosferën e frikësimit të dëshmitarëve që lidhet me këtë gjykim.
“Në këtë vendim, trupi gjykues po ashtu njoftoi se disa prej dëshmitarëve të Prokurorisë kanë refuzuar të japin dëshmi në sallën e gjyqit për arsye lidhur me sigurinë e tyre dhe të familjes”, tha Doyle.
Zëdhënësi tregoi se u rrëzua kërkesa e Prokurorisë për të shqyrtuar prova lidhur me fajësinë e mundshme penale të Thaçit në çështjen për krime lufte apo për përcaktimin e dënimit në rast vendimi fajësie.
“Trupi gjykues vendosi të mos i pranonte provat me qëllim që të garantonte të drejtën e zotit Thaçi për gjykim të drejtë”, tha Doyle.
Përveç kësaj, ishte rrëzuar edhe pjesa e kërkesës së Prokurorisë për të pranuar në prova tanskripte të Selimit dhe Veselit nga objekti i paraburgimit.
“Trupi gjykues rrëzoi gjithashtu kërkesën e Prokurorisë për të pranuar prova që përfshinin transkripte të Rexhep Selimit dhe Kadri Veselit nga objekti i paraburgimit, ku duket se ata nxjerrin informacion konfidencial lidhur me dëshmitarë të mbrojtur, duke cituar të njëjtat arsye, dhe po ashtu rrëzoi kërkesën e Prokurorisë për të ndryshuar listën e provave materiale për shkak se nuk kishte paraqitur arsye bindëse si dhe për arsye se kërkesa nuk u dorëzua në kohë”, tha Doyle.
Ndryshe, Dhomat e Specializuara të Kosovës në Hagë, çdo të enjte, në orën 14:30, përmes platformës online “Zoom” mbajnë informim javor ku ofrojnë informacione të përditësuara mbi zhvillimet e fundit lidhur me procedurat gjyqësore dhe veprimtaritë në këtë gjykatë.
