Aktivisti i çështjes shqiptare në diasporë dhe ish-administratori i Fondit “Vendlindja Thërret”, Haki Morina, e ka komentuar artikullin e kryetarit të kuvendit, Dimal Bashës, i cili si bashkautor me Jana Arsovskan, pretendonin se Ushtria Çlirimtare e Kosovës është financuar nga “trafikantë të drogës”.
Morina tha se ky artikull për shumë mërgimtar ka qenë ofendim i hapur ndaj kontributit të madh që e kanë dhënë ata për luftën dhe çlirimin e Kosovës.
“Në bazë të rrjeteve sociale dhe atyre pak mërgimtarëve që kam takuar del që zbulimi i këtij artikulli ka shkaktuar befasi negative, indinjatë të thellë pasi i ofendon të gjithë ndjenjat patriotike dhe kontributin e madh që e kanë dhënë mërgimtarët gjatë luftës”.
“Ndjehemi të fyer pasi mohohet drejtpërdrejt i gjithë kontributi ynë me vite radhë, i gjithë kontributi ynë mjaft i vështirë pasi s’ishte e lehtë në atë kohë që të ndaje edhe kafshatën e bukës për të kontribuar në formën që kishim mundësi ta ndihmonim UÇK-në”.
“Ky pamflet anti-shqiptar natyrisht që nuk mund të pritet mirë nga askush, përveç prej atyre që janë me ndjenja armiqësore ndaj komb
it shqiptar”, tha Morina në Edicionin Special në Klan Kosova.
Tutje, ai tregoi se si administrator i Fondit “Vendlindja Thërret”, në rastet e veçanta kur ka pasur shuma të mëdha kontributdhënse, i ka njohur personalisht njerëzit që kanë kontribuar dhe e di se nga i kanë siguruar mjetet.
“Shembull, jo shumë larg meje është një person me mbiemër Brahimi, e kam njohur personalisht. Ai ka hy në kredi 26 mijë franga, në fillim të luftës”.
“Pastaj është rasti i një veprimtari në Gjenevë që e ka dhënë përafërsisht një shumë të tillë, por ka pasur nëntë fëmijë, shumica të punësuar dhe s’e ka pasur problem t’i siguronte ato shuma”.
“Por në përgjithësi, shumat që supozohen që mund të mblidheshin nga krimi, ne i kemi pasur të identifikuara fare mirë dhe e dimë që s’ka pasur të bëjë absolutisht me burime të dyshimta financiare”, tha Morina, njofton Klankosova.tv.
Ai më tej u shpreh se ka qenë personi ekskluziv që i ka regjistruar të gjitha shumat, emrat, mbiemrat dhe adresat e mërgimtarëve që kanë kontribuar pasi tha se është dashur t’i njoftonte se shuma e të hollave ka arritur në fond.
“Shumica nga mërgimtarët i kanë dhënë nga 500-1000 franga, që kuptohet se s’kanë si ta kenë burimin e paditur”.
“Unë kam qenë personi ekskluziv që i kam regjistruar të gjitha shumat, të hyrat, emrat, mbiemrat, adresat, për shkak se më duhej të ua dërgoja të gjithë atyre që kontribuonin njoftimin se shuma e caktuar e të hollave kanë arritur në Fondin ‘Vendlindja thërret’”.
