Nëntë diplomatët e njohur që pritet të dëshmojnë pro ish-presidentit të Kosovës, Hashim Thaçit, dëshminë e tyre nuk do të mund ta japin menjëherë.
Edhe pse në moshë të shtyrë e me probleme shëndetësore, Gjykata Speciale e ka rrëzuar kërkesën e avokatit të Thaçit që këta diplomatë të dëshmojnë menjëherë, pasi që ka rrezik të vdesin.
Ndaj këtij vendimi të Speciales ka reaguar ish-këshilltari i Hashim Thaçit, Artan Behrami.
Ai ka shkruar në “Facebook” kur Gjykata Speciale i frikësohet dëshmitarëve të mbrojtjes, tregon se ka diçka për t’u fshehur.
“Kur Gjykata Speciale i frikësohet dëshmitarëve të mbrojtjes, tregon se ka diçka për t’u fshehur. Tribunali i Hagës gjeneralin Clark e ka pranuar si dëshmitar kundër Millosheviçit. Derisa, Gjykata Speciale nuk e pranon gjeneralin Clark të dëshmojë për pastërtinë e luftës sonë dhe për koordinimin e UÇK-së me NATO’n. E tmerrshme!”, ka shkruar Behrami.
Gjykata Speciale nuk ka pranuar që këta 9 diplomatë të njohur si Bernard Kouchner, Wesley Clarck, William Walker e të tjerë, të ftohen menjëherë për të dhënë dëshmi.
Kjo pasi sipas vendimit të gjyqtarit, nuk janë ofruar argumente të mjaftueshme se dëshmia e këtyre diplomatëve, mund të bëhet e pashfrytëzueshme më vonë.
