Një nga pajisjet më të shumëpritura të vitit 2026 duket se ka marrë formë. Sipas një rrjedhjeje informacioni nga një burim i njohur për saktësinë e tij, Apple po përgatitet të prezantojë iPhone-in e parë palosës, të quajtur jozyrtarisht “iPhone Fold”.
Jon Prosser, YouTuber i njohur për publikimin e informacioneve të hershme rreth produkteve të Apple, ka ndarë pamje 3D të asaj që ai pretendon se është dizajni i pajisjes së parë palosëse të kompanisë. Në një video të publikuar në kanalin e tij FrontPageTech, Prosser paraqet modele digjitale që tregojnë se si mund të duket iPhone Fold.
Sipas tij, në vitin 2026 Apple pritet të lançojë vetëm tre modele të reja iPhone: iPhone 18 Pro, iPhone 18 Pro Max dhe këtë pajisje të re palosëse, të cilën ai e përshkruan si kandidat serioz për t’u bërë telefoni i radhës për shumë përdorues.
Prosser pretendon se Apple ka eksperimentuar me disa dizajne – si modeli “clamshell” (me hapje vertikale) ashtu edhe ai në stil libri – por në fund ka zgjedhur dizajnin në formë libri, të ngjashëm me pajisjet palosëse të Samsung dhe Google. Nëse kjo rezulton e saktë, Apple do të hyjë drejtpërdrejt në konkurrencë me Samsung Galaxy Z Fold dhe Google Pixel Pro Fold, të cilat tashmë janë të konsoliduara në këtë segment.
Reagimet e fansave kanë qenë kryesisht entuziaste, me mijëra komente pozitive dhe pritshmëri të larta. Edhe pse iPhone-i palosës është përfolur prej vitesh, gjithnjë e më shumë sinjale tregojnë se prezantimi zyrtar mund të ndodhë në shtator 2026.
Një nga pikat ku Apple synon të diferencohet nga rivalët është mungesa e vijës së palosjes (crease) në ekran – një problem i shpeshtë dhe shpesh i kritikuar në telefonat palosës ekzistues. Sipas Prosser, Apple ka gjetur një zgjidhje duke përdorur një pllakë metalike që shpërndan presionin gjatë palosjes, si dhe metal të lëngshëm në mekanizmin e menteshës, për të minimizuar ose eliminuar këtë efekt.
Në gjendje të mbyllur, pajisja pritet të duket pothuajse si një iPhone standard, me trashësi rreth 9 mm dhe një ekran të jashtëm 5.5 inç. Kur hapet plotësisht, përdoruesi do të përballet me një ekran të brendshëm rreth 7.8 inç, i krahasueshëm me një iPad të vogël, ndërsa trashësia do të ulet në rreth 4.5 mm.
Sa i përket kamerave, thuhet se iPhone Fold do të ketë gjithsej katër kamera: një në ekranin e jashtëm, dy kamera të pasme dhe një kamerë të brendshme për përdorim kur pajisja është e hapur.
Një nga elementet më të pazakonta të përfolura është rikthimi i Touch ID, në vend të Face ID. Sipas Prosser, sensori i gjurmës së gishtit do të integrohet në butonin e ndezjes, i cili pritet të rikthehet në pjesën e sipërme të telefonit.
Ndryshe nga modelet Pro të fundit, që u ofruan në ngjyra më të guximshme si portokalli dhe blu, versioni palosës pritet të vijë vetëm në dy ngjyra klasike: të zezë dhe të bardhë.
Sa i përket çmimit, edhe pse nuk jepen shifra konkrete, Prosser paralajmëron se iPhone Fold do të jetë jashtëzakonisht i shtrenjtë, duke e pozicionuar atë në segmentin më të lartë të tregut.
Duhet theksuar se, pavarësisht reputacionit të burimit, këto informacione mbeten jozyrtare dhe Apple nuk ka konfirmuar asnjë detaj. Megjithatë, nëse këto rrjedhje rezultojnë të sakta, iPhone Fold mund të përfaqësojë një nga ndryshimet më të mëdha të dizajnit në historinë e iPhone-it.
