Informatori i FBI-së është akuzuar për fabrikimin e një skeme ryshfeti multi-milionëshe që përfshin presidentin e SHBA-së, Joe Biden, djalin e tij Hunter dhe një kompani energjetike ukrainase, një pretendim që është kyç për hetimin e impiçmentit të republikanëve në Kongres.
Alexander Smirnov dha deklaratë të rreme në FBI në qershor 2020 se drejtuesit e lidhur me kompaninë ukrainase të energjisë “Burisma” i paguan Hunterit dhe Joe Bidenit nga 5 milionë dollarë secilit në vitin 2015 ose 2016, thanë prokurorët në një aktakuzë. Smirnov i tha menaxherit të tij se drejtori ekzekutiv pretendonte se kishte punësuar Hunter Bidenin për të “na mbrojtur, nëpërmjet babait të tij, nga të gjitha llojet e problemeve”, sipas dokumenteve të gjykatës.
Prokurorët thonë se Smirnov në fakt kishte vetëm marrëdhënie biznesi rutinë me kompaninë në vitin 2017 dhe i bëri akuzat për ryshfet pasi ai “shprehte paragjykime” kundër Joe Bidenit ndërsa ishte kandidat presidencial.
Smirnov, 43-vjeç, u paraqit në gjykatë në Las Vegas për një kohë të shkurtër të enjten pasi u akuzua për dhënien e një deklarate të rreme dhe krijimin e një regjistrimi të rremë dhe fiktive. Pretendimet e informatorit kanë qenë kyçe në përpjekjet e republikanëve në Kongres për të hetuar presidentin dhe familjen e tij që çuan në fillimin e hetimit për impiçment në Dhomën e Përfaqësuesve ndaj Bidenit.
Demokrati i lartë në Komitetin Mbikëqyrës të Dhomës së Përfaqësuesve, Jamie Raskin nga Maryland, bëri thirrje për t’i dhënë fund hetimit për impiçment të Bidenit. Kryetari i Komisionit, James Comer dhe republikanët e Dhomës së Përfaqësuesve, minimizuan rëndësinë e informatorit, i cili kishte qenë në qendër të fillimit të hetimit.
“Për të qenë i qartë, hetimi i shkarkimit nuk mbështetet në FD-1023 të FBI-së”, tha Comer në një deklaratë, duke iu referuar formularit që dokumenton pretendimet e Smirnovit.
Kryetari tha se hetimi “bazohet në një histori të madhe provash, përfshirë të dhënat bankare dhe dëshmitë e dëshmitarëve”, duke përfshirë intervistat këtë javë. Ai tha se komiteti do të vazhdojë të “ndjekë faktet” dhe të përcaktojë nëse do të vazhdojë me nenet e fajësimit kundër Biden.
Nëse shpallet fajtor, Smirnovi përballet me një dënim maksimal prej 25 vitesh burg. Akuzat u ngritën nga këshilltari special i Departamentit të Drejtësisë, David Weiss, i cili ka akuzuar veçmas Hunter Bidenin për shkelje të armëmbajtjes pa leje dhe taksave.
Hetimi për impiçmentin e Bidenit mbi marrëdhëniet e biznesit të djalit të tij ka ngecur në Dhomën e Përfaqësuesve, por paneli po e shtyn përpara punën e tij. Hunter Biden pritet të dalë para komitetit në fund të këtij muaji. Avokati i tij, Abbe Lowell tha se ai kishte paralajmëruar prej kohësh se hetimi bazohej në “gënjeshtra të thëna nga njerëz me agjenda politike, jo në fakte”.
