Ish-kryediplomati i Kosovës, Skender Hyseni është deklaruar rreth çështjes së Asociacionit dhe deklaratave të fundit të kryeministrit Albin Kurti rreth kësaj teme.
Përmes një postimi në Facebook, Hyseni e ka cilësuar Kurtin “figurë politike tragjikomike.
Ai ka deklaruar se prej se Kurti ka ardhur në pushtet, e ka përsëritur me bindje që asociacioni i komunave me shumicë serbe është obligim ndërkombëtar dhe si i tillë, deshëm ose nuk deshëm, si obligim ndërkombëtar duhet të zbatohet.
“Në ndërkohë, kryeministri Kurti dhe Presidentja Osmani demonstruan pazotësi akute për të lexuar dhe kuptuar qartë porositë e mbështetësve kryesorë të Kosovës në botë. Kjo u pa sidomos me veprimet dhe kryeneqësinë në veri të vendit. Ata, pra Kurti dhe Osmani, pa vizion, pa guxim dhe pa dije e kthyen Kosovën pothuaj në pikën zero. “Argumentet” e Kurtit kundër asociacionit së bashku me kushtet, janë qesharake. Ai mashtron opinionin vendor kur thot që Gjykata Kushtetuese e ka hudhur poshtë Asociacionin. Kjo ështe gënjeshtër. Ai poashtu manipulon kur thot “asociacioni është një-etnik, sepse nuk është. Me vet faktin që thuhet “komunat me shumicë serbe” do të thotë që ne ato komuna ka edhe pjestarë të etnive tjera. Sipas logjikës së Kurtit edhe Kosova është monoetnike sepse është 92% shqiptare. Por ja që edhe Kosova është multietnike sepse ka një 8% të etnive tjera. Natyrisht që Kurti do ta themelojë asociacionin, sepse ikja nga ky obligim është katastrofal për Kosovën”, ka deklaruar Hyseni.
Hyseni ka deklaruar se kushtet që Kurti i ka deklaruar sot, kanë qenë aty edhe pa Kurtin.
