Deputetja e Lidhjes Demokratike të Kosovës, Hykmete Bajrami, ka reaguar ka kritikuar Qeverinë Kurti në dorëheqje, duke i quajtur si “abuzues të besimit të qytetarëve” pas rritjes së çmimit të faturave të rrymës.
Ajo përmes një postimi në llogarinë e saj në Facebook, ka treguar të dhëna se si bizneset kanë marrë oferta për furnizim me energji elektrike “nga KESCO me çmim 260% më të lartë se çmimi aktual”.
Madje ajo ka thënë se kur distribucioni është privatizuar, partia e saj ka qenë në opozitë. Derisa thotë se deputetja Mimoza Kusari ishte pjesë e qeverisë atëherë, kurse deputeti Armend Muja ishte pro qeverisë e kundër LVV-së.
“LDK ka qenë në opozitë kur është privatizuar distribucioni, Mimoza ka qenë pjesë e Komitetit ndërministror që e ka bë privatizimin, si zëvendëse e Hashim Thaçit dhe ministre e Tregtisë, e Armend Muja në atë kohë ka qenë pro qeverisë e kundër LVV”, shkroi ajo mes tjerash
Postimi i plotë:
Shkelësit e Kushtetutës – superkriminelët sipas Albin Kurtit janë ngritë në këmbë duke e arsyetu ngritjen e çmimit të energjisë elektrike 128% për qytetarë e 260% për bizneset prodhuese e për punëdhënësit më të mëdhenj në vend. Arsyetimin e tyre ata e lidhin me rrëzimin nga Gjykata Kushtetuese të Ligjit për çmimet tavan. Këta jo vetëm që janë abuzues të pozitave zyrtare, të besimit që ju ka dhënë qytetari, por edhe janë të padijshëm, e si të tillë tentimin për manipulim me opinionin e kanë të neveritshëm.
Lidhja Demokratike e Kosovës ka qenë dhe është gjithmonë në mbrojtje të Kushtetutës, ligjeve, interesit qytetar dhe ekonomisë së tregut. Për dallim prej servilëve të Kurtit që për të qenë taman servil ndaj tij flasin edhe kundër diplomave e shkollave të tyre, ne e bëjmë dallimin në mes të ”konkurrencës së lirë” dhe ”monopolit”. Është fakt i pamohueshëm që deri tani bizneset kanë marrë vetëm një ofertë për furnizim me energji pas datës 1 qershor, këtë ofertë e kanë marrë nga KESCO me çmim 260% më të lartë se çmimi aktual.
Dhe po ne nuk e fshehim, jemi në mbrojtje të qytetarëve dhe interesit të tyre, të cilët përpos faturave të larta të energjisë do të goditën edhe nga një valë tjetër e inflacionit dhe po jemi në mbrojtje të 1300 bizneseve më të mëdha në vend, por LVV është kundër qytetarëve e kundër bizneseve sepse po bën e po mbron politika që e godasin qytetarin e biznesin vendor dhe favorizojnë monopolin e mafinë energjetike që ka lulëzuar gjatë qeverisjes së LVV-së.
Sqarim:
LDK ka qenë në opozitë kur është privatizu Distribucioni, Mimoza ka qenë pjesë e Komitetit ndërministror që e ka bë privatizimin, si zëvendëse e Hashim Thacit dhe ministre e Tregtisë, e Armend Muja në atë kohë ka qenë pro qeverisë e kundër LVV.
