Tema e ekonomisë vikendin që shkoi përplasi jo pak partinë opozitare LDK-në me pushtetin. Por, edhe kjo javë ka vazhduar me ‘luftën’ e njëjtë, ku deputetë të partisë së Lumir Abdixhikut kanë adresuar kritika ndaj ministrit të Financave, Hekuran Murati.
Sot kritikën e parë Muratit ia ka dhënë deputetja Hykmete Bajrami, e cila e ka quajtur ministër propaganda, pasi ministri i Financave tha se kategoria buxhetore e pagave në sektorin publik në vitin 2023 është rritur për 114 milionë euro krahasuar me vitin paraprak, apo 17% rritje mesatare vjetore.
Bajrami ka thënë se në këtë 17% të rritjes së pagave, ministri Murati e ka llogaritë pagën e vet e të stafit politik dhe pagën 7500 euro të Gani Jakupit, pasi shton se askujt tjetër nuk i është rritur paga.
“Ministër propaganda po thotë që i ka rritë pagat 17%, në këtë 17% e paska llogaritë pagën 7500 euro të Gani Jakupit dhe pagën e vet e të stafit politik që ky me tu bërë ministër i financave i ka dyfishu. Realiteti është se askujt tjetër në vend në sektorin publik nuk i është rritë paga 17% gjatë vitit 2023, askujt. Dhe kur ti thua që i ke shpenzu më shumë 17% më shumë në paga kjo nuk i bjen që i ke rritë pagat për 17%, por i bjen që ke taksat e qytetarëve po paguan Gani Jakupin e shokët e tij që nuk janë të paktë dhe ky është keqpërdorim i parasë publike.
Ndërsa sa i përket rritjes së pagave në kohën e Avdullah Hotit minister i financave, ta kujtoj se inflacioni në atë kohë ka qënë -0.4 % (2015); 0.3% (2016) dhe 1.5% (2017), ndërsa në mandat tëndin inflacioni këto tri vite ka kalu 23%, dmth. çdo pagë është zhvlerësu me së paku 23%”, ka shkruar Bajrami në Facebook.
Ajo tutje i rekomandon Muratit t’i pyet pensionistët se si ndihen sot me 100 euro.
“Pyeti pensionistët qysh ndihen sot. 100 eurot që ju ke dhënë njëherë gjatë vitit 2023 ju kanë përmirësu jetën atyre që i kanë marrë një javë, vetëm një javë, hiç ma shumë. Po të punoje e të dije, sot pensionet të ishin më të larta se paku për 23%, aq sa ka inflacion.
Pensionistët nuk i kanë pasë problem çmimet e larta vetëm javën kur ti ju ke dhënë 100 euro, ata përballën me çmime të larta çdo ditë.
Edhe e fundit ministër propaganda, 70 milionë euro që i kemi shpërnda për biznese në kohën e mbylljes totale të pandemisë ka qënë masa me transparente në histori të Qeverive të Republikës së Kosovës. Qysh po mendon me i arsyetu ti 881 milionë euro që i ke shpërndarë pa asnjë efekt, asnjë”, ka thënë tutje deputetja e LDK-së.
Ajo ka pyetur Muratin se çka ndodhi me premtimin për 160 çerdheve të reja, banesave të reja.
“Çka ndodhi me 160 çerdhe? 4000 banesa për qifte të reja? Shportë të konsumit me të lirë? Energji me të lirë? Etj? E kujt është kjo propagandë?”, ka shkruar Bajrami në Facebook.
