Në margjinat e konferencës për lidhjen e Ballkanit Perëndimor, diplomacinë parlamentare, për sigurinë rajonale dhe integrimin Euro-Atlantik, të organizuar nga Komisioni për Punë të Jashtme dhe Diasporë i Kuvendit të Kosovës, ish-kryediplomati i Kosovës, Enver Hoxhaj, deklaroi ndër të tjera se kërcënimet e sigurisë së Kosovës e kanë burimin në Serbi, me mbështetje gjeopolitike të Rusisë.
“Sot kemi hyrë përfundimisht në një kohë kur mendimet tona formësohen nga lufta, paqja dhe siguria si asnjëherë më parë! Nëse lufta në Ukrainë para dy vitesh dhe lufta në Gaza vitin e kaluar, ndikuan mbi përceptimin tonë, këtë vit ndonjë agresion rus ndaj Moldavisë edhe më shumë do ta mbajë gjallë temën e luftës në mendjen tonë! Kërcënimet në Evropën Lindore mund të barten shpesh në Ballkan, por kërcënimet e sigurisë së Kosovës e kanë burimin në Serbi, me mbështetje gjeopolitike të Rusisë!”, tha Hoxhaj.
Hoxha renditi tre shqetësime që, sipas tij, ndërlidhen me Kosovën në veçanti dhe rajonin në përgjithësi.
“Këtu dua t’i përmendi tri shqetësime që kanë të bëjnë me Kosovën dhe vet rajonin! Së pari, dhuna në veri, akti i agresionit në Banjskë dhe situata e tanishme tregojnë që Serbia ka për qëllim të shndrrojë komunat në veri të Kosovës në pikën më nervlagjike, më të tensionuar të sigurisë në Evropë, jashtë Ukrainës!”, tha Hoxhaj.
Ish-kryediplomati konsideroi se rikthimi i procesit politik me zgjedhje, me pjesëmarrje të komunitetit serb në institucionet e policisë, sundimit të ligjit dhe gjyqësisë, është kyç për të shmangur vakumin institucional.
“Prandaj e shoh kyçe në veri të vendit rikthimin e procesit politik me zgjedhje, me pjesëmarrje të komunitetit serb në institucionet e policisë, sundimit të ligjit dhe gjyqësisë! Sot, është një vakum institucional, qoftë në raport të popullatës serbe me komunat në veri dhe vakum institucional të raportit të serbëve lokalë me qeverinë dhe institucionet qendrore!”, tha Hoxhaj.
“Së dyti, dialogun me Serbinë e shoh të rëndësishëm jo vetëm për normalizim të raporteve ndërshtetërore, por edhe për sigurinë rajonale, e cila mund të arrihet vetëm përmes një marrëveshjeje jo bazike, por gjithëpërfshirëse, me njohje të ndërsjellë si marrëveshje finale! Së treti, duhet patjetër të përmbyllet shtet-ndërtimi i Kosovës dhe pa ndodhur kjo, si parakusht bazë i sigurisë, prioriteti më i lartë i Kosovës dhe partnerëve tanë duhet të jetë anëtarësimi në NATO.” – tha ai më tej.
