Për herë të parë në histori të klubit, FC Drita është kualifikuar në fazën e “play-off”-it në UEFA Conference League dhe është vetëm një hap larg përfshirjes në fazën e grupeve.
Skuadra gjilanase shënoi fitore në ndeshjen e kthimit të rrethit të tretë kundër FC Auda nga Letonia para tifozëve të vet në stadiumin “Fadil Vokrri”, me rezultat 3:1, pas 120 minutave lojë.
Ndeshja në kohën e rregullt u mbyll 1:0, me golin e Besnik Krasniqit nga penalltia (75′), rezultat me të cilin kishte përfunduar edhe ndeshja e parë në Riga.
Ndërkaq në vazhdimet dy herë nga 15 minuta fillimisht shënuan mysafirët, por më pas Drita shkëlqeu. Në minutën e 102-të Rron Broja shënoi me kokë nga afërsia për 2:1, derisa në minutën e 114-të realizoi Albert Dabiqaj, po ashtu me gjuajtje me kokë për të vulosur kualifikimin e skuadrës së tij.
Përgëzime për futbollistët, stafin e trajnerëve, drejtuesit e klubit dhe tifozët “Intelektualët” për kualifikimin tutje.
Ju priftë e mbara në ndeshjen e radhës në “play-off” kundër Legia Varshavës.
🔵⚪️👏👏⚽️🇽🇰
