Lëvizja Vetëvendosje sot ka publikuar një video, ku krenohet me të bëmat e Qeverisë Kurti II në këto katër vite.
Në sektorin e mbrojtjes, aty përmenden veprimet që janë ndërmarr në armatosjen e Forcës së Sigurisë së Kosovës.
Ndër të tjera, aty pretendohet se Kosova ka blerë nga ShBA-ja edhe helikopter “Black Hock”, ndonese deri me tani Kosova nuk e ka blerë asnjë helikopter të tillë.
“Investuam në Forcat e Sigurisë si asnjëherë më parë, duke trefishuar buxhetin, katërfishuar trajnimet, duke blerë sistem modern të armatimit si dronë bajraktar, sistem antitank javelin, helikopterët Black Hock dhe tash po ndërtojmë fabrikën e municionit”, thuhet në vidën e VV-së.
Një pretendim i tillë demantohet edhe nga vetë kryeministri Albin Kurti.
Ky i fundit, gjatë fushatës zgjedhore për zgjedhjet e 9 shkurtit, vazhdimisht thoshte se Kosova “do të blejë” nga ShBA-ja helikopter të tillë.
Një gjë të tillë e kishte thënë edhe gjatë tubimit në Ferizaj.
“Po nga kjo Amerikë mike, po nga kjo partnere e aleate, po blejmë raketa anti-tank “Javelin” e do të blejmë edhe helikopter Black Hock. Edhe helikopter që me i përkthy i bjen skifteri i zi, e të cilët ju këtu i njihni shumë mirë, sepse i keni parë shpesh teksa fluturojnë mbi qiellin e Ferizajt e aterojnë në Bondsteel. E pra, të njëjtit helikopter do t`i kenë edhe pilotët tanë, edhe ushtria e jonë”, kishte thënë Kurti.
