Kryetarja e Kuvendit të Kosovës dhe ushtruesja e detyrës së presidentes, Albulena Haxhiu, ka deklaruar se është e gatshme të ndihmojë në arritjen e një zgjidhjeje për çështjen e presidentit.
Ajo ka theksuar se diskutimet dhe takimet po vazhdojnë dhe se është e hapur për të kontribuar në këtë proces, nëse është e nevojshme.
“Tashmë takimet po vazhdojnë, ka pasur edhe dje takim për këtë qëllim dhe do të vazhdojnë edhe në ditët në vijim. Unë jam shumë e hapur që të ndihmoj, nëse mundem, në këtë drejtim”, ka deklaruar Haxhiu, gjatë takimit me Avokatin e Popullit të Shqipërisë në zyrën e saj në Kuvend.
Një ditë më parë, kryeministri Albin Kurti u takua me kryetarin e LDK-së, Lumir Abdixhiku, për të diskutuar për këtë çështje, por takimi nuk prodhoi ndonjë rezultat.
Ky proces ka nisur pas përfundimit të mandatit të presidentes Vjosa Osmani më 4 prill. Në të njëjtën ditë, detyrën e ushtrueses së presidentes e mori Albulena Haxhiu, në përputhje me Kushtetutën.
Kurti pritet të zhvillojë takime edhe me kryetarin e PDK-së, Bedri Hamza.
Megjithatë, Hamza i ka kërkuar atij që çdo iniciativë të formalizohet me letër zyrtare, në mënyrë që të diskutohet brenda organeve të partisë.
Nga PDK është bërë e ditur se nuk është pranuar ndonjë ftesë e re për takim.
Deputetja Blerta Deliu-Kodra tha se partia nuk do të propozojë emra për president pa një marrëveshje politike, duke theksuar se përgjegjësia për zgjedhjen e presidentit i takon partisë në pushtet, e cila ka shumicën në Kuvend.
Lëvizja Vetëvendosje më 5 mars kishte propozuar dy kandidatë për president, Glauk Konjufcën dhe deputeten Fatmire Mullhaxha-Kollçaku.
Megjithatë, për shkak të mungesës së kuorumit, procesi nuk ka vazhduar.
