Kapiteni i Anglisë e ka konsoliduar statusin e tij si sulmuesi më i mirë i Europës që nga largimi nga Tottenham.
Bayern Munich ka hapur bisedime me Harry Kane për një zgjatje kontrate, ka konfirmuar një drejtues i klubit.
Ish-sulmuesi i Tottenhamit dhe kapiteni i Anglisë po kalon sezonin më të mirë të karrierës së tij, me 34 gola dhe katër asistime në vetëm 30 paraqitje në të gjitha kompeticionet, dhe pritet të shpërblehet me një kontratë të re.
Marrëveshja aktuale e Kane, e cila raportohet të jetë rreth 480 mijë euro (416,100 paund) në javë, është e vlefshme deri në qershor të vitit 2027.
Por sipas një raportimi nga “Sky Germany”, Bayerni është i gatshëm t’i ofrojë 32-vjeçarit një kontratë të re që mund të zgjasë deri në vitin 2028 ose 2029.
Raporti shton se sulmuesi është i hapur për ta zgjatur qëndrimin te klubi dhe nuk ka konsideruar një transferim tjetër, pavarësisht interesimit të raportuar nga Barcelona dhe ish-klubi i tij, Tottenham.
Drejtori sportiv i Bayern Munich, Max Eberl, e konfirmoi për “Sky Germany” se negociatat janë në zhvillim: “Jemi në bisedime me Harryn.”
Me Kane në krye të sulmit, Bayerni është mposhtur vetëm dy herë këtë sezon: në transfertë ndaj Arsenalit në Ligën e Kampionëve dhe në shtëpi kundër Augsburgut në Bundesliga.
Kjo i lë bavarezët tetë pikë përpara në krye të Bundesligës me 13 ndeshje të mbetura për t’u luajtur, një avantazh që në masë të madhe i atribuohet paraqitjeve të jashtëzakonshme të Kane.
Ai kryeson gjithashtu garën për Këpucën e Artë Europiane, i barabartë me Kylian Mbappé në krye të renditjes me 21 gola në kampionat, ndërsa Erling Haaland ndjek nga afër me 20 gola.
Kane nuk e ka fshehur kurrë dashurinë e tij për Mynihun, ku fitoi trofeun e parë në karrierë vetëm pak muaj pasi i dha fund një periudhe 19-vjeçare pa trofe te Tottenham.
Duke folur në nëntor, ai u shpreh: “Kalimi te Bayerni ishte një nga vendimet më të mira të jetës sime”.
