Kandidati për kryeministër nga AAK, Ramush Haradinaj ka thënë se kontributi I Ali Ahmetit për shqiptarët në Ballkan ka qenë i jashtëzakonshëm.
Ai në Facebook gjatë një bisede me Ahmetin, tha se potencoi se bashkëpunimi mes Kosovës dhe Maqedonisë së Veriut duhet të jetë prioritet.
Postimi i plotë:
Ali Ahmeti është një prej figurave më të respektuara shqiptare. Kontributi i tij në të gjitha proceset nëpër të cilat kanë kaluar shqiptarët në Ballkan, të paktën në këto 30 e sa vitet e fundit, ka qenë i jashtëzakonshëm. Pata kënaqësinë që sot ta zhvilloj me të një bisedë vëllazërore për sfidat nëpër të cilat po kalojnë vendet tona.
Bashkëpunimi i Kosovës me Maqedoninë e Veriut duhet të jetë prioritet në marrëdhëniet tona, dhe shqiptarët në Maqedoni të Veriut janë faktorë përcaktues mbi të cilin zhvillohen këto marrëdhënie.
Kosova do të jetë gjithmonë mbështetëse e vëllezërve tanë në kërkesat e tyre legjitime për mbrojtjen dhe avancimin e të drejtave, duke përfshirë edhe përdorimin e gjuhës shqipe në RMV.
