Kandidati për kryeministër nga Aleanca për Ardhmërinë e Kosovës (AAK), Ramush Haradinaj, ka premtuar investime të mëdha në turizmin malor dhe ulje të çmimit të energjisë elektrike, si pjesë e platformës së tij zgjedhore “Kosova Fituese 137”.

Haradinaj ka theksuar se Deçani, me bukuritë dhe potencialin e tij natyror, mund të bëhet një adresë ballkanike e turizmit dimëror. Ai ka premtuar investime të mëdha në këtë sektor, duke e konsideruar turizmin dhe bujqësinë si shtylla të zhvillimit ekonomik të komunës.

“Do të investojmë dhe do ta shndërrojmë këtë zonë në adresë ballkanike të turizmit. Turizmi dhe bujqësia mund të bëhen shtylla të zhvillimit ekonomik të Komunës, e për realizimin e të cilave do ta ketë edhe dorën e Shtetit,” ka shkruar Haradinaj.

Ai gjithashtu ka bërë premtime për mbështetje të rinisë dhe bizneseve të vogla, duke përfshirë bursa për studentët, financim pa kthim për të rinjtë që duan të hapin biznese dhe trefishim të subvencioneve për bujqit.

“Energjia nuk do të jetë malli më i shtrenjtë. Do ta ulim çmimin për 20 përqind,” ka deklaruar ai.