Kryetari i Partisë Demokratike të Kosovës, Bedri Hamza, ka kujtuar sot përvjetorin e rënies heroike të Zahir Pajazitit, Hakif Zejnullahut dhe Edmond Hoxhës, duke vlerësuar lart sakrificën e tyre për lirinë e vendit.
Në një postim publik, Hamza ka theksuar se rënia e tyre i dha drejtim lirisë së Kosovës dhe mbetet një nga momentet më të rëndësishme të historisë sonë të re.
“Komandanti Zahir Pajaziti ishte mishërim i guximit dhe i vendosmërisë në një kohë kur liria dukej e largët dhe e pamundur,” ka shkruar Hamza, duke nënvizuar rolin udhëheqës dhe frymëzues të tij në rrugën e rezistencës dhe çlirimit.
Sipas kryetarit të PDK-së, sakrifica e këtyre heronjve, ashtu si ajo e çdo dëshmori të Ushtrisë Çlirimtare të Kosovës, përbën themelin mbi të cilin është ndërtuar shteti i Kosovës dhe shërben si kujtesë e përhershme e sakrificës shekullore të popullit shqiptar për liri dhe pavarësi.
Hamza e ka përmbyllur mesazhin e tij me nderim të thellë për dëshmorët, duke theksuar se kujtimi për ta do të mbetet i përjetshëm.
“Lavdi e përjetshme dëshmorëve të lirisë!”, ka përfunduar ai.
https://www.facebook.com/share/p/189ScL6Jzg/?mibextid=wwXIfr
