Wojciech Szczęsny ka zbuluar rrethanat e jashtëzakonshme të kalimit të tij nga Juventusi te Barcelona, duke treguar se sezoni i tij i parë në Spanjë ka qenë praktikisht “pa pagesë”.
Duke folur për “GQ Poland”, me deklarata të transmetuara nga “CalcioMercato”, portieri polak shpjegoi se pas largimit nga Juventusi madje kishte menduar seriozisht të tërhiqej nga futbolli.
“Tre ditë para se ta shpallja zyrtarisht tërheqjen, i thashë Lewandowskit se nuk doja të luaja për asnjë klub… përveç Barcelonës,” zbuloi Szczęsny.
“Kur më telefonuan, ata ndoshta e dinin që do të ishte e lehtë të më bindnin. Nuk e kisha humbur pasionin për futbollin, thjesht nuk isha i ngazëllyer nga ofertat e klubeve të Top 10. Nuk kishte të bënte me paratë… nuk doja të luaja vetëm për para”, shtoi ai.
Në fakt, sezoni i parë i Szczęsnyt te Barcelona ishte praktikisht falas.
“Gjithçka që mora financiarisht nga klubi ishte saktësisht aq sa më duhej për t’ia paguar Juventusit për ndërprerjen e parakohshme të kontratës,” pranoi ai.
Para transferimit, Szczęsny ishte ‘rrëzuar’ në rolin e portierit të dytë te Juventusi, pas afrimit të Di Gregorios.
Pas shtatë vitesh dhe tetë trofeve me bardhezinjtë, ai vendosi të prishte kontratën një vit më herët.
Klauzola kërkonte një pagesë prej 2 milionë euro, e cila përkonte pikërisht me pagën që Barcelona i ofronte – duke e bërë transferimin praktikisht të baraspeshuar.
Intervista e sinqertë e Szczęsnyt hedh dritë mbi një rrugëtim krejt të veçantë: nga zhgënjimi te Juventusi, drejt një aventure të re te një nga klubet më të mëdha të Europës – dhe sakrificat personale që ai bëri për ta bërë realitet këtë lëvizje.
