Në qendër të Tiranës, nën moton “Drejtësi për çlirimtarët”, mijëra qytetarë nga të gjitha trojet shqiptare u mblodhën në sheshin “Skënderbej” për të shprehur mbështetjen ndaj ish-krerëve të Ushtrisë Çlirimtare të Kosovës që po gjykohen në Hagë.
Fjalën hapëse në këtë tubim e mbajti Hysni Gucati, kryetari i Organizatës së Veteranëve të Luftës së UÇK-së, i cili theksoi se kjo nuk është një protestë politike, por një thirrje mbarëkombëtare për drejtësi.
“Jemi këtu për të ngritur zërin për të vërtetën e luftës sonë çlirimtare. UÇK-ja ka qenë dhe mbetet ushtri e lirisë. Nuk do të lejojmë që sakrifica e çlirimtarëve të përbaltet”, u shpreh Gucati mes duartrokitjeve të protestuesve.
Ai shtoi se proceset gjyqësore në Hagë po zhvillohen me standarde të dyfishta dhe se përmes tyre po tentohet barazimi i viktimave me agresorët.
“Kjo protestë është e popullit shqiptar, jo e partive. Ne nuk kërkojmë mëshirë, por drejtësi. Tirana sot është kryeqyteti i të gjithë shqiptarëve”, tha Gucati, duke e përmbyllur fjalimin me thirrjen: “Liri për çlirimtarët tanë!”.
