Deputeti i PDK-së, Përparim Gruda, ka theksuar se Lëvizja Vetëvendosje për katër muajt e fundit e ka shkelur Kushtetutën e vendit me zhvillimet që janë duke u bërë me moskonstituimin e Kuvendit të Kosovës.
Në emisionin DPT Fidani, ai ka theksuar se aktgjykimi i Gjykatës Kushtetuese i publikuar të enjten thotë se është shkelur Kushtetuta edhe në seancën e parë që u mbajt më 15 prill të këtij viti.
“Mendoj se janë tri elemente kyçe të aktgjykimit, e para aktgjykimi konstaton se çdo seancë që është zhvilluar deri tani është zhvilluar me shkelje të Kushtetutës. E keni në dispozitiv të aktgjykimit, pra aktgjykimi i Gjykatës Kushtetuese në pjesën operative thotë qartë: ‘Seanca konstituive e filluar më 15 prill të vitit 2025 nuk ka përfunduar si rezultat i moszgjedhjes së kryetarit dhe nënkryetarëve të Kuvendit të Republikës së Kosovës, dhe nuk është zhvilluar në pajtim me përcaktimet dhe kërkesat e paragrafit të nenit 66. Kush i ka bërë këto shkelje i ka bërë Lëvizja Vetëvendosje me Avni Deharin sepse ne nuk e kemi udhëhequr seancat”, ka thënë Gruda.
“Seancat i ka udhëhequr Avni Dehari me direktivat e Lëvizjes Vetëvendosje, aktgjykimi po thotë nuk janë zhvilluar sipas nenit 66. A mundemi me thënë se e kanë shkelur Kushtetutën për katër muaj? Po shumë e qartë. Aktgjykimi po thotë se nuk është zhvilluar sipas nenit 66. A kemi marrë ne pjesë në zhvillimin e këtyre seancave? A i kemi caktuar ne se si zhvillohen këto seanca? Jo. Gjithçka është udhëhequr nga Lëvizja Vetëvendosje, kështu që konstatimi i parë i Kushtetueses është shumë i qartë që kemi pasë shkelje për katër muaj të Kushtetutës. Kjo është e qartë, kushdo mund ta lexoj”, u shpreh i njëjti.
“Çështja e dytë është çështja e votimit të fshehtë që ka qenë çështja ndër më kryesoret votimi i fshehtë, poashtu edhe votimin e fshehtë Gjykata Kushtetuese e ka shpallur si jo kushtetues. Ka thënë nuk mund të ndërrohen procedurat e votimit në Kuvendin e Kosovës për kryetar pasi kanë filluar. Pika e tretë është zgjedhja e kryetarit të Kuvendit ky Gjykata Kushtetuese ka përcaktuar në mënyrë të qartë që partia që është fituese relative e zgjedhjeve është e detyruar të bashkëpunojë, të arrijë konsensus dhe të bëjë kompromise për të arritur tek zgjedhja e kryetari të Kuvendit”, u shpreh Gruda.
