Në Çair, komunë që udhëhiqet nga Lëvizja Demokratike, partia e sapothemeluar e Izet Mexhitit, ai përuroi një rrugë në emrin e veprimtarit të njohur të Kosovës, Adem Demaçi. Ndërsa në Tetovë në takim me kryetarin e kësaj komune, njëherit kryetarin e partisë opozitare, Lëvizja Besa, Bilall Kasami, Kurti foli për një projekt rrugor që do të lidhë Prizrenin dhe Tetovën.
Për përurimin e rrugës “Adem Demaçi” kryeministri i Kosovës, Albin Kurti u shoqërua nga kryetari i komunës Çair, Visar Ganiu, krytari i Lëvizjes Demokratike, Izet Mexhiti, kryetari i partisë Alternativa, Afrim Gashi dhe kryetari i partisë BESA, Bilall Kasami.
Gjatë përurimit të rrugës, Kurti emërtimin e kësaj rruge në emrin e Demaçit e ka vlerësuar të një rëndësie të veçantë.
Shefi i ekzekutivit tha se Demaçi me aktivitetet e tij që i kushtuan 28 vite burg u bë simbol i paepur për lirinë e shqiptarëve në ish-Jugosllavi.
“Nga përvoja ime e bashkëpunimit me bacin Adem, e di që figura më e dashur politike e shekullit 20 ishte Hasan Prishtina. Sot teksa kujtojmë Adem Demaçin natyrshëm kujtojmë edhe Hasan Prishtinën i cili nesër por 111 vite më parë erdhi dhe çlirojë Shkupin bashkë me Bajram Currin dhe Isa Boletinin, ndërsa pasnesër 90 vite më parë u vra mizorisht në Selanik”, tha Kurti.
Ndonëse, në përurimin e rrugës “Adem Demaçi” morën pjesë kryeministri kosovar dhe tre kryetar të partive opozitare shqiptare në Maqedoninë e Veriut, kishte një prezencë të vogël të qytetarëve.
Në lidhje me këtë nuk la pa ironizuar zëvëndëskryeministri dhe njëherit njëriu me i afërt i Ali Ahmetit, Artan Grubi.
Për shkak të pjesëmarrjes së ultë të qytetarëve, Grubi pyeti nëse kishte ndonjë ngjarje në Çair.
“A mos ka bo vaki najsend”, ka shkruar Grubi.
Nga Çairi, kryeministri Albin Kurti u nis për në Tetovë. Gjatë vizitës në qytetin më të rëndësishëm shqiptar në Maqedoninë e Veriut, kryeministri Kurti foli për projektin e rrugës që do të lidhë Prizrenin me Tetovën përmes edhe një tuneli të gjatë 6 km.
Për ta treguar rëndësinë e këtij projekti që lidh dy qytetet shqiptare, ai bëri një deklaratë të çuditshme.
““Kjo rruga që pamë këtu është rrugë e brendshme e komunës, por ne jemi shumë të interesuar që të ecim sa më shpejt për lidhjen infrastrukturore të Prizrenit të Tetovës, që në qiell ishin një qytet e në tokë janë dy, përmes aksit i cili parasheh edhe një tunel”, tha Kurti.
Nga Tetova kryeministri i Kosovës, Albin Kurti dhe liderët opzitarë shqiptarë të Maqedonisë së Veriut e ironizuan me Edi Ramën, kryeministër i Shqipërisë.
Kryetari i komunës së Tetovës, Bilall Kasami, ka publikuar në profilin e tij në Facebook një foto me kryeministrin kosovar, Albin Kurtin, kryetarin e Lëvizjes Demokratike, Izet Mexhitin dhe kreun e Alternativës, Afrim Gashin.
Në përshkrimin e fotos Kasami ka shkruar: “Në ballkon të hapur”.
Vizita jozyrtare dhe joformale e Albin Kurtit në Maqedoninë e Veriut në kohën kur opozita shqiptare po konfigurohet është pritur më shumë kritika.
Ushtruesi i detyrës së kryetarit të OVL-UÇK-së, Faton Klinaku, ka akuzuar kryeministrit Albin Kurti për përçarje të shqiptarëve në rajon.
Ai ka thënë se i pari i Qeverisë, pas përçarjes së faktorit politik në Luginë të Preshevës, po dëshiron t`i përçajë edhe shqiptarët në Maqedoninë e Veriut, me vizitën e sotme atje.
Në profilin e tij në Facebook, Klinaku ka shkruar se edhe veprimtari Adem Demaçi ka qenë i dëshpëruar me Kurtin.
“Së pari, Adem Demaçi ka qenë i dëshpëruar me ty Albin Kurti; Së dyti, e ke përça faktorin politik shqiptar në Kosovën Lindore (Preshevë, Medvegjë e Bujanoc); Së treti, ke shkuar në Çair por jam i sigurt se do ta përçani edhe faktorin politik shqiptar në Maqedoninë e Veriut. P.S Sa t’ke njerëz të hipnotizuar, “grahi” se mirë e ke”, ka shkruar Klinaku.
