Bashkimi i Sindikatave të Pavarura të Kosovës (BSPK), ka reaguar pas deklarimeve të ministrit Murati, sot, në një konferencë për media, i cili tha se grevistët nuk do të paguhen për orët e humbura, ndêrkaq akuzoi SBAShK-un se nuk dihet çfarë bën me milionat që i merr nga anëtarësia, shkruan Scanner.
BSKP thotë se Greva e Përgjithshme e BSPK-së është duke u zhvilluar.
“Por, ajo që e shqetëson BSPK-në është mosreflektimi i Partnerit tonë Social – Qeverisë përkitazi me kërkesat e arsyeshme sindikale”, thuhet në komunikatë, transmeton Scanner.
Komunikata e plotë:
Greva e Përgjithshme e BSPK-së është duke u zhvilluar
Komunikatë për shtyp e Bashkimit të Sindikatave të Pavarura të Kosovës
29 gusht 2022
Sot, e hënë, më 29 gusht 2022, duam të informojmë opinionin se greva e përgjithshme në nivel vendi është duke u zhvilluar mirë dhe pa probleme e plotësisht sipas rregullave dhe normave ligjore.
Por, ajo që e shqetëson BSPK-në është mosreflektimi i Partnerit tonë Social – Qeverisë përkitazi me kërkesat e arsyeshme sindikale.
Partneri ynë Social – Qeveria duhet që të punësuarve të saj t’ua dëgjojë hallet dhe të merret seriozisht me shqetësimet e tyre.
Partneri ynë Social – Qeveria duhet t’i jepet arsyes dhe të na thërrasë në tavolinën e bisedimeve e kjo do duhej të bëhet sa më parë për të mirën e të gjithëve.
BSPK është në pritje të hapjes së dialogut të mirëfilltë social midis Partnerëve Socialë ashtu si e do rregulli dhe si e thotë ligji./Scanner/
