Ish i dërguari special i ish-presidentit amerikan, Donald Trump, për dialogun Kosovë-Serbi, Richard Grenell ka thënë se lirimi i policit serb, Dejan Pantic, për në arrest shtëpiak është hapi i parë i de-eskalimit dhe që ai pret se pala serbe t’i largojë barrikdat.
Në një intervistë me Euronews në serbisht, ai tha se deklarata e përbashkët e Bashkimit Evropian dhe Shteteve të Bashkuara është deklaratë politike që nuk përmbajnë rezultate konkrete dhe se ai pret përfshirje më të madhe të ShBA-së, përcjell Periskopi.
I pyetur se si e sheh ai lajmin për lirimin e policit serb dhe mundësisë së de-eskalimit në veri të Kosovës, Grenell tha se është i lumtur me këtë lajm, teksa shprehu shqetësimit se forcat speciale janë transferuar për në vëri dhe që ka pasur arrestime.
“Lirimi për në arrest shtëpiak është një gjest i vullnetit të mirë. Unë mendoj se tani Qeveria e Serbisë duhet të përgjigjet njejtë, pra duke i larguar barrikadat”.
Grenell gjithashtu tha se Serbët në Kosovë nuk duhen të arrestohen për aktivitete të tilla sepse situata është shumë e tensionuar dhe se Prishtina ka bërë një lëvizje të mirë me transferimin e policit serb në arrest shtëpiak.
Ai foli edhe për përfshirjen e Shteteve të Bashkuara në procesin e dialogut, teksa bëri thirrje që Administrata Biden të jetë më agresive në këtë konflikt.
“Në kohën e Trump ne e kishim kuptuar se duhej të flitej për zhvillim ekonomik. Këto luftëra politike duhen të ndalen”, theksoi ai.
Grenell nuk la pa përmendur edhe kryeministrin Albin Kurti për të cilin bëri thirrje që të fokusohet në zhvillim ekonomik dhe jo në çështje politike me të cilat sipas tij Kurti po tenton të manipulojë dhe të arrijë poenta politike.
“Kurti duhet të fokusohet në njerëzit e Kosovës dhe në rritjen ekonomike. Ekonomia e Serbisë është duke u rritur dhe i bëj thirrje Qeverisë së Serbisë të fokusohet në çështje ekonomike, ku është duke bërë mirë. Shpresoj se Kurti ta kuptojë se këto armiqësi nuk e ndihmojnë situatën ekonomike të popullit të Kosovës. Nëse shikoni drejt ideve që Amerika i ka propozuar në 15 vitet e fundit, Kurti gjithmonë ka qenë kundër tyre. Ma thuani një që e ka pranuar Kurti. Kjo nuk i ndihmon popullit të Kosovës”, theksoi Grenell.
