Grabovci përkujton dëshmorët dhe martirët e Katundit të Ri: Gjaku i tyre nuk lejon të nëpërkëmbet lufta e UÇK-së

13:42 | 11/05/2023

109

- Advertisement -

Zyrtari i lartë Partisë Demokratike të Kosovës (PDK) dhe njëri nga figurat qendrore të UÇK-së, Adem Grabovci, ka përkujtuar të enjten dëshmorët dhe martirët e Katundit të Ri në Pejë.

Në mesin e të rënëve për liri, Grabovci ka përkujtuar edhe familjarët e tij, Xhafer dhe Miradije Grabovcin, të cilët kishin rënë për të mos vdekur kurrë para 24 vitesh.

Grabovci ka thënë se gjaku i të rënëve “nuk do të na lejoj në asnjë rrethanë të nëpërkëmbët lufta e pastër dhe e drejtë çlirimtare e UÇK-së”.

“Në nderim të 24-vjetorit të rënies në altarin e lirisë të dëshmorëve dhe martirëve në Katund të Ri të Pejës. Në mesin e tyre ishte edhe bashkëpunëtori im dhe i shumë bashkëluftarëve dhe bashkëveprimtarëve në ditët më të vështira të ilegales dhe luftës, familjari im Xhafer Grabovci, me të cilin bashkëvepruam gjatë gjithë angazhimeve deri në rënien e tij. Të shumta ishin torturat nga armiku që përjetoi Xhaferi, shkaku i aktivitetit atdhetar që bënte. Njëkohësisht i përkujtoj edhe motrën, Miradijen, dhe dhëndrrin Bardhin, të vrarë po në këtë ditë, tek të cilët ushqeheshim dhe strehoheshim me shumë bashkëveprimtarë gjatë aktivitetit tonë në shërbim të çlirimit, lirisë dhe pavarësisë së Kosovës. Gjaku i të rënëve nuk do të na lejoj në asnjë rrethanë të nëpërkëmbët lufta e pastër dhe e drejtë çlirimtare e UÇK-së. Vlerave të luftës sonë do t’u dalim zot dhe do t‘i mbrojmë. Lavdi të gjithë të rënëve për liri!”, ka shkruar Grabovci në “Facebook”.