Gjuha e urrejtjes në “Big Brother VIP Albania” duket se nuk po ndalet. Së fundmi, vëmendja është përqendruar te banori Rogert, i cili ka shpërthyer me fjalor të rëndë dhe ofendues ndaj Mal Rekocerit, duke shkaktuar reagime të shumta si brenda ashtu edhe jashtë shtëpisë më të famshme në Shqipëri.
Pas një sërë ofendimesh dhe akuzash të drejtuara ndaj Malit, situata ka marrë një tjetër dimension, duke përfshirë edhe familjen e tij. Ata kanë reaguar zyrtarisht pranë televizionit Top Channel, duke shprehur shqetësimin për gjuhën e përdorur dhe ndikimin që kjo sjellje mund të ketë.
Reagimi publik ka ardhur edhe përmes rrjeteve sociale. Nëna e Mal Rekocerit, Violete Kukaj, ka publikuar në Instagram një deklaratë zyrtare, ku dënon ashpër gjuhën e urrejtjes dhe kërkon respekt, jo vetëm për djalin e saj, por për çdo banor brenda shtëpisë së “Big Brother VIP Albania”.
Ngjarja ka hapur sërish debat mbi kufijtë e sjelljes, etikën dhe përgjegjësinë që mbart një format kaq i ndjekur nga publiku, sidomos kur bëhet fjalë për gjuhë fyese dhe mesazhe që mund të ndikojnë negativisht te shikuesit.
