Inspektori i përgjithshëm i ushtrisë gjermane, Carsten Breuer, tha se vlerësimi i të gjithë të rinjve meshkuj për mundësinë e shërbimit ushtarak është i domosdoshëm për të mos humbur kohë në rast emergjence mbrojtëse.
“Nga këndvështrimi ushtarak, është thelbësore që të vlerësohet e gjithë grupmosha. Vetëm kështu e dimë se kush është i disponueshëm dhe kë mund të thërrasim në rast mbrojtjeje, situatë që synojmë ta shmangim”, tha Breuer për grupin mediatik “RND”.
Edhe ministri gjerman i Mbrojtjes, Boris Pistorius, mbështet vlerësimet kombëtare për të gjithë të rinjtë meshkuj.
Breuer paralajmëroi se kryerja e vlerësimeve vetëm kur shpërthen një krizë do të sillte humbje kohe të çmuar. “Askush sot nuk mund të thotë me siguri se si do të jetë situata e sigurisë dhe e kërcënimeve në vitet e ardhshme”, shtoi ai.
Sipas planit aktual, ligji i ri për shërbimin ushtarak në Gjermani, që pritet të hyjë në fuqi më 1 janar, do të bazohet fillimisht në vullnetarizëm.
Ligjvënës të koalicionit qeverisës kanë propozuar që të rinjtë të përzgjidhen me short për vlerësim dhe, nëse numri i vullnetarëve mbetet i pamjaftueshëm, të përzgjidhen po rastësisht edhe për shërbim të detyrueshëm.
Megjithatë, Breuer theksoi se ushtria nuk duhet të kufizojë opsionet e saj operacionale. Ai u shpreh se synimi mbetet mbështetja te vullnetarët, por nëse kjo sasi nuk mjafton, “në rast se qeveria dhe Bundestagu vendosin thirrje të detyrueshme, do të përzgjidhnim ata që janë më të kualifikuar dhe të motivuar, sipas nevojave reale, jo në mënyrë të rastësishme”.
