Gjermania do të heqë embargon e pjesshme mbi eksportin e armëve për Izraelin duke nisur nga 24 nëntori, duke anuluar kështu një vendim të marrë në gusht si përgjigje ndaj operacioneve ushtarake të Izraelit në Gaza.
Zëdhënësi i qeverisë, Stefan Kornelius, tha se armëpushimi mes Izraelit dhe grupit militant palestinez Hamas, i cili është në fuqi që nga 10 tetori, është një arsye kryesore për heqjen e ndalimit.
“Armëpushimi është stabilizuar në javët e fundit”, tha Kornelius.
Ai gjithashtu përmendi përpjekjet për të arritur një paqe të qëndrueshme dhe për të rritur rrjedhën e ndihmave humanitare drejt Rripit të Gazës.
”Qeveria gjermane do të kthehet në mënyrë të përgjithshme tek shqyrtimi i çdo rasti individual dhe do të përgjigjet ndaj zhvillimeve të mëtejshme sa i përket eksportit të armëve”, tha ai.
Në fillim të gushtit, kancelari gjerman Friedrich Merz njoftoi pezullimin e eksportit të armëve për Izraelin që mund të përdoren në Rripin e Gazës “deri në një njoftim të mëtejshëm”, duke shënuar një ndryshim të rëndësishëm në politikën e jashtme gjermane.
Ky vendim erdhi disa orë pas vendimit të qeverisë izraelite për të zgjeruar operacionet ushtarake në Gaza dhe përbënte një largim të dukshëm nga qëndrimi tradicional i Berlinit, i cili ka qenë ndër mbështetësit më të fortë të Izraelit që nga sulmet e 7 tetorit 2023 nga terroristët e Hamasit.
