Ministrja e Jashtme, Donika Gërvalla, me ftesë të Sekretarit të Shtetit, Antony Blinken, do të marrë pjesë në “Summit of the Americas” në ShBA.
Këtë e ka bërë të ditur shefi i Stafit të Gërvallës, Sharr Jakupi, përmes një postimi në rrjetin social Facebook.
Ai gjithashtu është shprehur se kjo është hera e parë që Kosova përfaqësohet në ketë samit.
“Zëvendëskryeministrja, njëherësh ministrja e Punëve të Jashtme dhe e Diasporës, Donika Gërvalla, me ftesë të Sekretarit të Shtetit, Antony J. Blinken, do të marrë pjesë në “Summit of the Americas”, i cili do të mbahet në Los Angeles të ShBA-së. Kjo është hera e parë që Republika e Kosovës përfaqësohet në ketë samit”, ka shkruar Jakupi.
Jakupi, përmes këtij postimi, dha detaje edhe për takimet që do të zhvillohen atje.
“Në margjinat e këtij samiti, ministrja Gërvalla do të zhvillojë takime bilaterale me zyrtarë të lartë shtetërorë si dhe do të vazhdojë lobimin për të forcuar subjektivitetin ndërkombëtar të Kosovës”, shkroi tutje ai.
