Gërvalla me akuza të rënda: Anton Quni, Besian Mustafa, Armend Zemaj e Fadil Hadërgjonaj u bënë bashkë me Srpska’n kundër meje

Deputetja e Grupit Parlamentar të Vetëvendosjes, Donika Gërvalla, ka përmendur disa deputetë të LDK-së se u bënë bashkë me Listën Serbe për të votuar kundër saj.

Kur u pyet se edhe deputetja e Vetëvendosjes, Shqipe Selimi, s’votoi për të, Gërvalla iu drejtua gazetarëve me “mos përzieni kot”.

LDK ka pasë mundësi ta zhbllokojë Kuvendin nuk e ka bërë një gjë të tillë. Imagjinoni, aty në Kuvend janë të ulur djali i Xhemajl Mustafës, Besian Mustafa, nipi i Tahir Zemaj, Armend Zemaj, janë ulur dy komandantë të Koshares, Fadil Hadërgjonaj dhe Anton Quni, dhe këta të katërt janë bërë bashkë me PDK-në dhe Listën Serbe për të votuar kundër Donika Gërvallës.

“Edhe Shqipe Selimi…”, i reaguan gazetarët.

“Ajo nuk ka votuar. Mos përzieni kot. Mos i ngatërroni. Shqipe Selimi nuk është bërë bashkë me Listën Serbe për të votuar kundër meje. Besian Mustafa, Armend Zemaj, Anton Quni, Fadil Hadërgjonaj kanë pasë më shumë se një arsye për të votuar dje për propozimin tonë. S’ka person në skenën publike të Kosovës, i cili është angazhuar qe 20 e diçka vjet më hapur, më qartë dhe me një kosto të lartë politike për zbardhjen e krimeve të pasluftës”.