Janë zbardhur detaje nga pista e hetimeve rreth vdekjes së ish-reperit, njëherit vëllait të Unikkatilit, Mentor Palokaj, i cili vdiq në rrethana akoma të paqarta.
I ndjeri u gjet i vdekur të dielën, në një banesë në lagjen Arbëria në Prishtinë, teksa Policia e ka inicuar rastin “Hetim mbi vdekjen, armëmbajtje pa leje, posedim i narkotikëve. / Prishtinë 02.03.2025, 17:30″.
“Është raportuar se është gjetur pa shenja jete viktima mashkull kosovar, vdekjen e të cilit e ka konstatuar mjeku kujdestar. Në vendin e ngjarjes është gjetur dhe sekuestruar një armë zjarri si dhe substancë e dyshuar narkotike. Me vendim të prokurorit trupi i pajetë është dërguar në IML për obduksion.”, thuhet ndër tjera.
Detaje të reja ka dhënë edhe gazetari Miftar Zenjullahu, i cili tha se një orë pasi ka ndërruar jetë Palokaj, dikush ka dalë nga banesa e tij, por që ende janë detaje të pakonfirkuara.
“Akoma s’ka diçka të konfirmuar nga Policia, por që këto janë pistat që janë duke u zhvilluar nga hetuesit. Akoma nuk ka diçka nga Policia. Nga Policia thuhet se në trupin e të ndjerit nuk ka pasur shenja”, tha Zenjullahu në KlanKosova.
