Pothuajse 1.8 milion fëmijë janë detyruar të largohen nga shtëpitë e tyre në pesë vitet e fundit në Mali, Burkina Faso dhe Niger, një rritje e pesëfishuar nga më parë, sipas një sondazhi të publikuar nga Save the Children.
OJQ-ja analizoi të dhënat nga Komisioneri i Lartë i Kombeve të Bashkuara për Refugjatët, qeveritë e vendeve dhe Organizata Ndërkombëtare për Migracionin për të vlerësuar numrin e fëmijëve të zhvendosur në këto tre vende për këtë periudhë.
Sondazhi tregoi se numri i fëmijëve të detyruar të largoheshin nga shtëpitë e tyre u rrit nga rreth 321,000 në 2019 në rreth 1.8 milion sot. Përveç kësaj, Bregu i Fildishtë, i cili doli nga lufta civile në vitin 2011, është prekur gjithashtu nga efektet e situatës në Sahel.
Konflikti në Burkina Faso dhe Mali fqinj ka rezultuar në një rritje dymbëdhjetëfish të numrit të fëmijëve që kërkojnë strehim në atë vend, nga rreth 2,450 në fund të vitit 2022 në 29,700 aktualisht.
“Kriza e harruar kryesisht në Sahelin qendror mbetet një nga emergjencat më të këqija humanitare në botë, aq më tepër shkatërruese pasi është një krizë që prek fëmijët dhe prek një nga popullatat më të reja në botë,” nënvizoi Vishna Shah, një nga drejtueset e Save the Children në Afrikë.
Sipas OKB-së, fëmijët përbëjnë 40% të njerëzve të zhvendosur në mbarë botën, por kjo shifër rritet në rreth 58% në Afrikën Perëndimore dhe Qendrore.
Burkina Faso, Mali dhe Nigeri janë prekur nga vitet e luftës, grushtet e shtetit, varfëria ekstreme dhe pasiguria ushqimore në rritje.
Fëmijët përballen me sulme të dhunshme dhe rrezikun për t’u rekrutuar nga grupe të armatosura, pasi më shumë se dhjetë vjet pas fillimit të krizës në Mali në vitin 2012, situata e sigurisë në rajon vazhdon të përkeqësohet. Rajoni i Sahelit është gjithashtu në ballë të krizës klimatike.
