Roma ka konfirmuar emërimin e Gian Piero Gasperinit si trajner të ri të skuadrës.
Në njoftimin zyrtar, klubi verdhekuq ka theksuar se tekniku italian sjell me vete “taktika kreative, përkushtim të fortë në punë dhe aftësi të jashtëzakonshme për zhvillimin e lojtarëve”.
“Si pronarët, ashtu edhe Claudio Ranieri besojnë se Gasperini është njeriu i duhur për këtë mision. Mirë se erdhe në klub, Mister! Forza Roma!”, thuhet në komunikatën e klubit.
Sipas mediumeve italiane, Gasperini ka nënshkruar kontratë deri në vitin 2028 dhe do të punojë në bashkëpunim të ngushtë me Claudio Ranierin, i cili do të shërbejë si këshilltar teknik.
Ranieri luajti një rol të madh në sjelljen e Gasperinit në kryeqytet, ndërsa ai vetë përfundoi me sukses sezonin e kaluar me Romën, duke e renditur skuadrën në vendin e pestë me gjashtëdhjetë e nëntë pikë dhe duke e siguruar pjesëmarrjen në garat evropiane.
Gasperini, i cili së fundi u largua nga Atalanta pas nëntë vjetësh të lavdishëm, pritet të sjellë eksperiencën dhe vizionin e tij taktik në “Olimpico”. Gjatë periudhës në Bergamo, ai fitoi Europa League, arriti finalen e Kupës së Italisë, çerekfinalen e Champions League, si dhe e kualifikoi Atalantën në këtë garë elitare pesë herë në shtatë sezone.
Lamtumira e tij nga Atalanta u përcoll me mirënjohje të thellë nga klubi, që e cilësoi bashkëpunimin si një “kapitull të jashtëzakonshëm” në historinë e tyre.
