Në çerekfinalen e Ziraat Türkiye Kupası, Galatasaray triumfoi 2-1 ndaj rivalit të përjetshëm, Fenerbahçe, dhe siguroi një vend në gjysmëfinale.
Skuadra verdhekuqe do të përballet me Konyasporin për një biletë në finale. Ndërkohë, në minutat e fundit të ndeshjes pati një përplasje mes pankinave të dy skuadrave, çka çoi në ndërprerjen e përkohshme të lojës dhe ndëshkimin me katër kartonë të kuq.
Ndeshja u zhvillua në Kadıköy.
Në një përballje të zjarrtë në stadiumin e Fenerbahçes, Galatasaray arriti një fitore të rëndësishme me rezultatin 2-1, duke u kualifikuar në gjysmëfinale të Kupës së Turqisë.
Para ndeshjes, Fenerbahçe organizoi një surprizë të pazakontë për lojtarët e Galatasarayt. Nga altoparlantët e stadiumit u lëshuan tingujt e një maceje, gjë që shkaktoi habi edhe te tifozët në tribuna. Kjo lëvizje e Fenerbahçes u bë virale në rrjetet sociale dhe ndezi debat mes tifozëve të të dyja skuadrave.
Përveç kësaj, Fenerbahçe vendosi të luajë disa këngë të veçanta në stadium para derbit. U transmetuan fjalët e Jose Mourinhos “We are clean” (Ne jemi të pastër) në sfondin e këngës instrumentale “Gurbet” nga Özdemir Erdoğan.
Gjithashtu, u luajt edhe kënga “Amor Verdadero” e L-Gante dhe Wanda Nara, ish-bashkëshortja e Mauro Icardit, si dhe kënga “Heyecanı Yok” e Gazapizmit, e cila përmban vargjet “kanguru gibi zıplıyor herkes” (të gjithë kërcejnë si kangur).
Galatasaray e nisi ndeshjen furishëm dhe kaloi në avantazh në minutën e 10-të falë një goli të Victor Osimhen. Pas një gabimi të Çağlar Söyünçüs, sulmuesi nigerian e gjeti topin para këmbëve, hyri në zonë dhe e dërgoi në rrjetë.
Në minutën e 15-të, Fenerbahçe kërkoi një penallti për një prekje të dyshuar me dorë nga Kaan Ayhan, por gjyqtari Cihan Aydın nuk e dha. Pasi komunikoi me VAR-in, ai vendosi të mos ndryshojë vendimin.
Në minutën e 23-të, një gjuajtje e Kaan Ayhan u bllokua nga Filip Kostiç. Lojtarët e Galatasaray kërkuan një prekje me dorë dhe, pas një rishikimi të shkurtër në VAR, gjyqtari akordoi penallti në minutën e 26-të.
Victor Osimhen mori përsipër ekzekutimin e penalltisë dhe shënoi në minutën e 27-të, duke e çuar rezultatin në 2-0 për Galatasaray.
Tension në tribuna pas golit të dytë
Pas golit të Osimhen, tifozët e Fenerbahçes nisën të konfliktoheshin mes tyre në tribuna, duke shkaktuar kaos.
Në fundin e pjesës së parë, në minutën e 45+1-të, Sebastian Szymanski shënoi për Fenerbahçen, duke e çuar rezultatin në 2-1. Fillimisht, goli u anulua për pozicion jashtë loje, por pas rishikimit në VAR, u konfirmua si i rregullt.
Mesfushori i Galatasarayt, Mario Lemina, u detyrua të largohej nga fusha në minutën e 61-të për shkak të një dëmtimi dhe u zëvendësua nga Przemyslaw Frankowski.
Në minutat e fundit të ndeshjes, tensioni arriti kulmin kur pankinat e të dyja skuadrave u përfshinë në një përplasje fizike. Situata u përshkallëzua dhe gjyqtari ndëshkoi me karton të kuq Kerem Demirbay, Barış Alper Yılmaz dhe Mert Hakan Yandaş, si dhe ndihmës-trajnerin e Fenerbahçes, Salvatore Foti.
Në minutën e 90+11-të, Fenerbahçe pati një mundësi të artë për të barazuar. Pas një topi të gjatë në zonë, Dzeko e ul për Skriniarin, i cili tenton të dërgojë topin në rrjetë, por Davinson Sanchez e largon me një roveshatë spektakolare nga vija fatale.
Me këtë fitore 2-1, Galatasaray siguroi një vend në gjysmëfinale ku do të përballet me Konyasporin. Ky i fundit e siguroi kualifikimin duke mundur İskenderunspor 3-0 në çerekfinale. Fenerbahçe, ndërkohë, i dha lamtumirën turneut. /
