Franca ka nisur një plan kombëtar për përgatitjet e strehimit për të paktën 100 mijë refugjatë ukrainas.
Këtë e konfirmoi edhe kryeministri i Francës, Jean Castex, shkruan CNN.
“Gjithnjë e më shumë prej tyre [ukrainasit] po gjejnë strehë në Francë ose po kalojnë tranzit nëpër territorin tonë,” tha Castex.
Më shumë se 26 mijë refugjatë ukrainas kanë mbërritur në Francë që nga fillimi i luftës, sipas Castex.
Midis tyre, 10 mijë e 500 kanë përfituar qëndrim të përkohshëm të parashikuar nga politika e mbrojtjes së përkohshme të BE-së, e aktivizuar më 3 mars.
Kryeministri francez u zotua gjithashtu të ndihmojë refugjatët ukrainas të integrohen më mirë në tregun e punës të Francës, me kurse franceze të ofruara në agjencinë e punësimit të vendit.
“Ne po hyjmë në një krizë që do të zgjasë”, tha Castex.
“Është nderi i vendit tonë të mbajë pritjen më të ngrohtë të mundshme për miqtë tanë ukrainas”.
