Selektori i Kombëtares së Kosovës, Franco Foda e ka mbajtur sot një konferencë për shtyp në prag të dy ndeshjeve të tetorit, kundër Sllovenisë këtë të premte dhe më pas ndaj Suedisë të hënën që vjen.
Trajneri gjerman u shpreh optimist për përballjet e këtij muaji, sidomos për atë ndaj sllovenëve në stadiumin “Fadil Vokrri”.
Ndërkohë, foli edhe për rikthimin e madh të Edon Zhegrovës, i cili i ka munguar Kombëtares për një kohë të gjatë shkaku i lëndimit.
“Më e rëndësishmja është që Edoni e ka gjetur një ekip të ri, Juventusi. Dhe, e rëndësishme është që është i gatshëm dhe në dispozicion për të luajtur për Kosovën. Të gjitha gjërat do t’i diskutoj me Edonin, por edhe me lojtarët tjerë. I kemi katër ditë në dispozicion për ta parë gjendjen e ekipit dhe se kush do të jetë në formacionin startues”, deklaroi Foda.
