Juristja e mediave, Flutura Kusari ka reaguar ndaj gjuhës së ashpër të përdorur nga Blerim Vela, shef i kabinetit të presidentes Vjosa Osmani.
Kusari ka shënuar 7 pika përmes të cilave ka paraqitur të drejtat e gazetarëve.
Ajo këto pika i ka quajtur ligjerata dhe sugjerime qëllim-mire.
Postimi i plotë:
Ligjeratë dhe sugjerime qëllim-mira publike për shefin e kabinetit të presidentes Osmani, Blerim Vela, i cili paska zgjedhur sot, derisa po mbahet Samiti për Demokraci i Bidenit, për t’i ndërlidhur mediat me Beograd.
1. Liria e shprehjes dhe e medias është e drejtë themelore. Gazetarët kanë të drejtë të raportojnë atë që e dëgjojnë, shohin apo hulumtojnë.
2. Kur subjekti i përmendur, në këtë rast presidentja Osmani ose stafi i saj, mendon që raportimi nuk respekton etikën, ligjet apo përmban të pavërteta, atëhëere duhet shfrytëzuar mjetet e brendshme që i disponon institucioni publik apo/dhe rrugët ligjore.
3. Mjetet e brendshme janë: komunikatë sqaruese për media, kërkesë për korrigjim drejtuar mediumit apo konferencë për media.
Rrugët ligjore janë: ankesë në Këshillin e Mediave të Shkruara për mediat online ose ankesë në Komisionin e Pavarur për Media për raportime në televizione dhe radio. Si mjet i fundit është padia për shpifje në gjykatë duke u siguruar parapakisht që nuk është padi SLAPP.
4. Roli i shefit të kabinetit nuk është që të mbrojë Gjykatën Kushtetuese, atë ka kush e mbron, edhe atëherë kur pushteti e sulmon. Si dhe, nuk mbrohet shteti nga puçi përmes Tëitter.
5. Ndërlidhja e gazetarëve me Beograd duke nënkuptuar që po iu shërbejne serbëve është gjest i ulet, i rrezikshëm, i papranueshëm dhe me pasoja. Pasoja është rrezikimi i drejtëpërdrejtë i gazetarëve duke i bërë ata target si “bashkëpunëtorë” të Serbisë.
6. Këtë sulm, organizatat vendore dhe rajonale do ta regjistrojnë atë si sulm kundër gazetarëve i bërë nga zyra më e lartë në vend. Rrjedhimisht, kjo do të reflektojë në vlerësimin që i bëhet vendit tonë.
7. Përdorni vetëm mjetet e brendshme dhe ligjore për të kundërshtuar raportimet mediale.
Ju falenderoj për vëmendjen!
