Skuadra braziliane Fluminense ka siguruar kualifikimin në gjysmëfinalen e Kupës së Botës për Klube, pasi e ka mposhtur ekipin saudit Al Hilal me rezultat të ngushtë 2-1.
Ndeshja është zhvilluar me ritëm të lartë dhe me shumë kujdes në mbrojtje nga të dyja skuadrat. Në pjesën e parë, rastet e rrezikshme kanë qenë të pakta, por loja është ndezur në minutën e dyzet, kur Matheus Martinelli ka shënuar pas një aksioni të shpejtë, duke e çuar topin në këndin e sipërm të portës. Megjithatë, pak minuta më vonë, Martinelli është ndëshkuar me karton të verdhë që e përjashton atë nga ndeshja e radhës.
Al Hilal është rikthyer në pjesën e dytë dhe e ka barazuar rezultatin në minutën e pesëdhjetë e një me një gol të Marcos Leonardo, pas një kombinimi me Kalidou Koulibaly dhe Ruben Neves. Sauditet kanë kërcënuar seriozisht edhe pas golit, por portieri Fabio dhe mbrojtja e Fluminenses kanë treguar vendosmëri.
Goli vendimtar për brazilianët ka ardhur në minutën e shtatëdhjetë nga Hercules, i cili ka finalizuar saktë pas një pasimi me kokë nga Samuel Xavier. Më pas, Xavier e ka pasur edhe një tentim tjetër për të shënuar, por është ndalur nga portieri Yassine Bounou, para se të largohej i lënduar nga fusha.
Fitorja e sotme e Fluminense garanton atyre një vend në gjysmëfinale, ku do të përballen me fituesin e duelit Palmeiras – Chelsea. /Rtklive/
