“Ti nuk i përket kësaj toke” … “Pse je këtu?” … “Ndalo frymën”.
Që kur doli hapur si homoseksual në vitin 2021, futbollisti Josh Cavallo ka marrë kërcënime me vdekje dhe mesazhe abuzive çdo ditë në mediat sociale.
“Kur i pashë këto mesazhe për herë të parë, më copëtua zemra. Po përpiqem të përmirësohem si lojtar dhe të jem sa më i mirë që mund të jem në fushë, dhe pastaj të më kritikojnë për atë që jam si person. Është e neveritshme”, thotë Cavallo për BBC Sport, transmeton Klankosova.tv
Cavallos i duheshin vite të tëra për të mbledhur guximin të thoshte “Jam gej” përpara se të dilte hapur më 27 tetor 2021, duke u bërë i vetmi futbollist profesionist mashkull i nivelit të lartë në botë që e deklaronte hapur homoseksualitetin.
Këtë verë ai u largua nga Australia për t’u bashkuar me ekipin jo-lig Peterborough Sports, i cili luan para rreth 400 tifozëve në National League North, niveli i gjashtë i futbollit anglez.
Cavallo është kritik ndaj FIFA-s, organit qeverisës të futbollit botëror, pasi Katari, ku marrëdhëniet e të njëjtit seks janë të paligjshme, priti Kupën e Botës për meshkuj në vitin 2022, shkruan BBC.
Turneu i vitit 2034 do të mbahet në Arabinë Saudite, ku homoseksualiteti është gjithashtu i paligjshëm.
“A jam i impresionuar që Kupa e Botës zhvillohet në vende që kriminalizojnë martesat e të njëjtit seks, ku njerëz si unë do të futen në burg vetëm sepse ekzistojnë në atë tokë? Është e frikshme”, thotë Cavallo. Marr mesazhe [nga njerëz që jetojnë në këto vende] që thonë ‘Do të më futin në burg për atë që jam – a mund të më ndihmoni?’ Më thyen zemrën që njerëzit po burgosen vetëm sepse janë ata që janë”, tha ai.
Pavarësisht kësaj, Cavallo thotë se nuk do të ndalet së foluri hapur.
“Qëllimi im është të krijoj ndryshim. Për këtë jam këtu”, përfundoi ai.
