Federata e Futbollit e Kosovës ka përmbyllur me sukses ciklin e takimeve me të gjitha regjionet e vendit, në kuadër të Strategjisë për Zhvillimin e Futbollit të të Rinjve dhe prezantimit të dokumentit strategjik “Formatet e lojës për grupmoshat U7–U15” (Game formats/Players pathway).
Takimet janë zhvilluar nga data 28 korrik deri më 1 gusht 2025, duke përfshirë të gjitha regjionet: Mitrovicë, Pejë, Gjilan, Ferizaj, Prizren, Gjakovë dhe Prishtinë. Në këto takime morën pjesë udhëheqës të klubeve, trajnerë të kategorive të reja, si dhe përfaqësues të strukturave komunale të sportit.
Takimet u karakterizuan me pjesëmarrje të gjerë dhe diskutime të frytshme rreth përmbajtjes së dokumentit të ri, i cili përcakton qasjen moderne të zhvillimit të fëmijëve në futboll, në përputhje me praktikat më të mira evropiane.
Qëllimi kryesor i prezantimeve ishte informimi dhe përgatitja e komunitetit të futbollit për fillimin e zbatimit të formateve të reja të lojës nga sezoni i ardhshëm, si dhe krijimi i një kuadri të bashkërenduar për rritjen e cilësisë së edukimit sportiv në moshat e reja.
Kjo iniciativë është një hap i rëndësishëm drejt ngritjes së standardeve të edukimit në futbollin e të rinjve në Kosovë, me qëllim që çdo fëmijë të ketë mundësi të rritet në një mjedis të shëndetshëm, të organizuar dhe të orientuar drejt zhvillimit të potencialit të plotë sportiv.
