I dërguari i posaçëm amerikan për Ballkanin Perëndimor, Gabriel Escobar, është deklaruar për krijimin e asociacionit të komunave serbe në Kosovë.
Ai ka thënë se në takimin e kryeministrit Albin Kurti dhe presidentes Vjosa Osmani, me Sekretarin Amerikan i Shtetit Anthony Blinken, ky i fundit ka kërkuar që asociacioni të krijohet dhe se për këtë ka pasur pajtim.
“Ne nuk vendosim afate. Kërkesa e vetme, nëse mund ta quani kështu, është që ajo duhet të jetë e radhës në axhendë. Pra, ne do të duhet të flasim për atë komunitet dhe se si do ta zbatojmë atë. Ky është një obligim ekzistues, është nënshkruar në marrëveshje dhe tashmë ajo marrëveshje ka kaluar nëpër procese të ndryshme në qeverinë e Kosovës dhe është konfirmuar. Në takimin e Sekretarit të Shtetit, presidentit Osmani dhe kryeministrit Kurti, zoti Blinken tha se duhet të zbatohet, për të cilën jemi pajtuar”, ka thënë Escobar, në N1.
Ai po ashtu ka folur edhe për raportimet se Blinken mund të bëhet pjesë e dialogut, duke thënë se Sekretari amerikan nuk ka deklaruar se do t’i bashkohet negociatave, por se është i gatshëm të bëjë thirrje për të mbështetur procesin.
“Nuk ka thënë se do t’i bashkohet procesit të negociatave, por se është i gatshëm të bëjë disa thirrje, të mbështesë procesin e negociatave dhe të çojë në bashkëpunim më të ngushtë mes palëve negociuese. Dua të theksoj gjithashtu se gjërat për të cilat po flasim aktualisht – targat dhe dokumentet personale – janë në fakt një çështje e vogël brenda platformës së përgjithshme të negociatave. Ka të ngjarë që angazhimi i Amerikës të jetë i domosdoshëm, jo në negociata, por pas dialogut, për të forcuar rrugën drejt suksesit, për të arritur paqen përfundimtare ndërmjet Serbisë dhe Kosovës dhe për të hapur një perspektivë evropiane për të dyja vendet”, ka vijuar deklaratën e tij Escobar.
