Presidenti Recep Tayyip Erdogan paralajmëroi Izraelin të mërkurën kundër “ndjekjes së anëtarëve të Hamasit në Turqi”.
Dhe nëse Izraeli provon një gjë të tillë, ka thënë Erdogan, do të paguajë një çmim shumë të rëndë për këtë.
Ai gjithashtu hodhi poshtë planet për të krijuar një zonë tampon në Gaza pas përfundimit të luftimeve në enklavë.
Siç ka theksuar më tej ai, një plan i tillë ishte “mosrespektues” për palestinezët.
Duke folur me gazetarët në një fluturim që kthehej nga Katari, Erdogan tha se e ardhmja e Gazës pas luftës do të vendoset nga populli palestinez dhe se Izraeli duhet të kthejë territoret që pushton, sipas transmetuesit Haberturk.
Ai pretendon se mbështetja perëndimore për Izraelin, përkatësisht nga Shtetet e Bashkuara, ka shkaktuar gjendjen aktuale në rajon.
Ndryshe, Izraeli kishte thënë se është i vendosur të eliminojë Hamasin në mbarë botën, edhe nëse duhen vite për ta bërë këtë.
Kështu ka thënë zyrtari i lartë i sigurisë vendase Ronen Bar, sipas një regjistrimi të transmetuar nga transmetuesi publik Kan të dielën, shkruante CNN, përcjell Telegrafi.
“Kabineti na vendosi një qëllim – të eliminojmë Hamasin. Dhe ne jemi të vendosur ta bëjmë këtë. Ky është Mynihu ynë. Kudo: në Gaza, Izrael, Liban, Turqi, Katar, kudo”, citohet të ketë thënë shefi i Shin Bet.
Përmendja e Mynihut nga Bar është një referencë për fushatën e synuar të vrasjes së Izraelit kundër operativëve dhe organizatorëve të “Shtatorit të Zi”, pas sulmeve vdekjeprurëse të grupit palestinez kundër izraelitëve në Lojërat Olimpike të vitit 1972 në Gjermani.
