- Advertisement -
Presidenti i Turqisë, Rexhep Tayip Erdogan, do të vizitojë qytetin bregdetar rus Soçi për t’u takuar me homologun e tij rus, Vladimir Putin.
Presidenca turke njoftoi se vizita do të zhvillohet më 5 gusht, por nuk dha detaje të tjera në lidhje me vizitën, shkruan Anadolu.
Vizita vjen disa ditë pasi Turqia, Kombet e Bashkuara (OKB), Rusia dhe Ukraina nënshkruan një marrëveshje për të rifilluar eksportet e grurit përmes tre porteve të Ukrainës pas muajsh bllokimi për shkak të luftës Rusi-Ukrainë.
Eksportet do të rifillojnë së shpejti, të koordinuara nga një qendër e përbashkët në Stamboll.
Të mërkurën e kaluar, Erdogan dhe Putin u takuan gjatë një takimi trepalësh me homologun e tyre iranian, Ebrahim Raisi, në kryeqytetin Teheran të Iranit.
