Pas përfundimit të festave të fundvitit, muaji janar shpesh konsiderohet si periudha kur shumë çifte vendosin t’i japin fund marrëdhënieve të tyre. Ndonëse nuk është një “rregull” për të gjithë, ka disa arsye që shpjegojnë këtë prirje.
Sipas një raporti të USA Today, në vitin 2018, kërkimet për fjalën “divorc” arritën kulmin nga data 6 deri më 12 janar. Një studim i Universitetit të Washington zbuloi gjithashtu se mes viteve 2001 dhe 2015, numri i kërkesave për divorc në shtetin e Washington fillonte të rritej që në janar.
Fundi i vitit dhe fillimi i një të riu shpesh shoqërohen me reflektime dhe vendime për ndryshime jetësore. Festat e fundvitit, ndonëse përshkruhen si një periudhë e lumtur, shpesh janë burim stresi dhe tensioni. Pushimet shpesh nënkuptojnë më shumë kohë për çiftet, por nëse marrëdhënia ka probleme, kjo kohë shtesë mund të shërbejë si katalizator për konflikte.
Siç shpjegon psikoterapistja Dr. Karen Phillip, fillimi i një viti të ri sjell reflektime mbi jetën personale. Nëse një person ndihet i pakënaqur apo i zhgënjyer në marrëdhënie, kjo mund të jetë koha për të marrë një vendim të rëndësishëm.
Ekspertë si Jacob Lucas, vënë në dukje se gjatë periudhave festive, çiftet që nuk janë të lumtur nuk kanë mundësi për “shpëtim” përmes punës apo aktiviteteve të tjera. Ky “presion i mbyllur” mund të çojë në konflikte të mëdha në janar.
Ndërkohë, avokatja Alberta Tevie thekson se shumë çifte qëndrojnë bashkë gjatë festave për hir të fëmijëve apo familjes, por tensionet e mbledhura shpesh çojnë në ndarje pas përfundimit të periudhës festive.
