Përkundër që Lille u mposht nga Paris Saint-Germain me rezultat 3:1, Edon Zhegrova ishte lojtari më i dalluar në fushë nga të dy skuadrat, madje duke shënuar një gol të jashtëzakonshëm.
Si PSG, ashtu edhe Lille e kanë nisur shumë mirë sezonin e ri, dhe hynë në duelin e sotëm pas dy fitoreve në dy xhirot e para, me vendasit që sonte pësuan humbjen e parë sezonale.
Skuadra e Luis Enriques pati më shumë nga ndeshja, duke krijuar më tepër raste shënimi, por që inferiorë nuk ishin aspak Lille, të cilët i vunë kampionët në fuqi shumë herë në vështirësi.
Parisienët shënuan golin e parë nga penalltia në momentet më të mira për Lillen në lojë. Ribeiro shkaktoi ndërhyrje në Demblen dhe Vitinha u tregua i saktë për 1:0.
Bradley Barcola nuk vonoi shumë dhe në minutën e 36-të e dyfishoi epërsinë, duke çuar skuadrën e tij në pushim me rezultat 2:0.
Lille e filloi pjesën e dytë shumë më mirë, ku kërkonin ta gjenin golin me ngulm.
Këtë e bënë. Ylli i Kombëtares së Kosovës, Edon Zhegrova, shënoi gol të jashtëzakonshëm nga distanca në minutën e 78-të për të ngushtuar rezultatin në 2:1.
Por, PSG-ja arriti të shënonte edhe një herë për të shuar çdo dilemë. Ishte Kolo Muani që realizoi në minutat shtesë për rezultatin përfundimtar 3:1.
PSG tani ka tri fitore në po aq ndeshje, teksa Lille e pëson humbjen e parë, krahas dy fitoreve.
Për Edon Zhegrovën kjo ishte paraqitja e parë për këtë sezon në Ligue 1, pasi në dy ndeshjet e para ishte i pezulluar nga sezoni i kaluar.
Ai ishte lojtari më i dalluar në fushë në këtë ndeshje nga të dy skuadrat, duke bërë pesë driblime të suksesshme e 91% i saktë në pasimet e tij në fushë. Fitoi tetë duele dhe krijoi tri raste të mira për skuadrën e tij.
