Edon Cana, kandidat i PDK-së për kryetar të Rahovecit

Edon Cana nga Partia Demokratike e Kosovës, e do të garojë për kryetar të Komunës së Rahovecit në zgjedhjet lokale që do të mbahen më 12 tetor.

Lajmin e ka bërë të ditur vetë Cana përmes një postimi në Facebook, ku ka shprehur mirënjohjen ndaj strukturave të PDK-së për besimin dhe mbështetjen.

“Sot, Kryesia e Degës së PDK-së në Rahovec më besoi përgjegjësinë dhe nderin e madh për të qenë kandidat për kryetar të Komunës së Rahovecit. Ky vendim është më shumë se një kandidaturë – është një thirrje për punë, përkushtim dhe vizion të qartë për të ardhmen e komunës sonë,” ka shkruar ai.

Cana tha se beson në fuqinë e qytetarëve të Rahovecit dhe në energjinë e të rinjve për ta çuar përpara komunën drejt zhvillimit dhe përmirësimit të jetës për të gjithë.

Ai paralajmëroi se ditëve në vijim do të prezantojë një program të detajuar zhvillimor, që do të jetë, sipas tij, “i ndryshëm dhe i guximshëm”.

“Faleminderit për mbështetjen! Rahoveci meriton ma mirë,” përfundoi Cana në postimin e tij.